Trains Cancelled Ahead of Delhi Protest October 10: ਨਵੀਂ ਦਿੱਲੀ ਅਤੇ ਹਜ਼ਰਤ ਨਿਜ਼ਾਮੂਦੀਨ ਰੇਲਵੇ ਸਟੇਸ਼ਨਾਂ ਵੱਲ ਸਫ਼ਰ ਕਰਨ ਵਾਲੇ ਯਾਤਰੀਆਂ ਲਈ ਅਹਿਮ ਖ਼ਬਰ ਹੈ। ਦਿੱਲੀ ਦੀਆਂ ਮੁੱਖ ਸੜਕਾਂ ‘ਤੇ ਆਵਾਜਾਈ ਵਿੱਚ ਸੰਭਾਵੀ ਵਿਘਨ ਅਤੇ ਭਾਰੀ ਜਾਮ ਦੇ ਮੱਦੇਨਜ਼ਰ ਰੇਲਵੇ ਪ੍ਰਸ਼ਾਸਨ ਨੇ 10 ਅਕਤੂਬਰ 2026 ਨੂੰ ਚੱਲਣ ਵਾਲੀਆਂ ਚਾਰ ਅਹਿਮ ਰੇਲਾਂ ਨੂੰ ਰੱਦ ਕਰਨ ਦਾ ਫ਼ੈਸਲਾ ਲਿਆ ਹੈ।
ਡੀਆਰਐੱਮ ਦਾਨਾਪੁਰ ਵੱਲੋਂ ਜਾਰੀ ਕੀਤੀ ਗਈ ਸੂਚਨਾ ਅਨੁਸਾਰ ਇਹ ਰੋਕ ਉਨ੍ਹਾਂ ਰੇਲਾਂ ‘ਤੇ ਲਗਾਈ ਗਈ ਹੈ ਜਿਨ੍ਹਾਂ ਨੇ ਸ਼ਨੀਵਾਰ ਸਵੇਰੇ 4 ਵਜੇ ਤੋਂ ਦੁਪਹਿਰ 2 ਵਜੇ ਦਰਮਿਆਨ ਇਨ੍ਹਾਂ ਦੋਹਾਂ ਸਟੇਸ਼ਨਾਂ ‘ਤੇ ਪਹੁੰਚਣਾ ਸੀ। ਇਸੇ ਰਣਨੀਤੀ ਤਹਿਤ 9 ਅਕਤੂਬਰ ਨੂੰ ਦੁਪਹਿਰ 2 ਵਜੇ ਤੋਂ ਬਾਅਦ ਆਪਣੇ ਸ਼ੁਰੂਆਤੀ ਸਟੇਸ਼ਨਾਂ ਤੋਂ ਰਵਾਨਾ ਹੋਣ ਵਾਲੀਆਂ ਮੇਲ ਤੇ ਐਕਸਪ੍ਰੈੱਸ ਗੱਡੀਆਂ ਨੂੰ ਸਰੋਤ (ਸੋਰਸ ਸਟੇਸ਼ਨ) ਤੋਂ ਹੀ ਰਵਾਨਾ ਨਾ ਕਰਨ ਦੇ ਹੁਕਮ ਦਿੱਤੇ ਗਏ ਹਨ। ਰੇਲਵੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਕਦਮ ਰੇਲਵੇ ਟਰਮੀਨਲਾਂ ਦੇ ਆਲੇ-ਦੁਆਲੇ ਸੰਭਾਵੀ ਟ੍ਰੈਫਿਕ ਜਾਮ ਕਾਰਨ ਪੈਦਾ ਹੋਣ ਵਾਲੀ ਖੱਜਲ-ਖ਼ੁਆਰੀ ਨੂੰ ਰੋਕਣ ਦੇ ਮੱਦੇਨਜ਼ਰ ਚੁੱਕਿਆ ਗਿਆ ਹੈ।
ਰੱਦ ਕੀਤੀਆਂ ਗਈਆਂ ਰੇਲ ਗੱਡੀਆਂ ਦਾ ਵੇਰਵਾ:
-
ਗੱਡੀ ਨੰਬਰ 20801 – ਮਗਧ ਐਕਸਪ੍ਰੈੱਸ: ਇਸ ਨੇ 10 ਅਕਤੂਬਰ ਨੂੰ ਦੁਪਹਿਰ 12 ਵਜੇ ਨਵੀਂ ਦਿੱਲੀ ਪਹੁੰਚਣਾ ਸੀ।
-
ਗੱਡੀ ਨੰਬਰ 12309 – ਰਾਜੇਂਦਰ ਨਗਰ-ਨਵੀਂ ਦਿੱਲੀ ਤੇਜਸ ਰਾਜ ਐਕਸਪ੍ਰੈੱਸ: ਇਸ ਦੇ ਪਹੁੰਚਣ ਦਾ ਸਮਾਂ ਸਵੇਰੇ 7:40 ਵਜੇ ਨਿਰਧਾਰਤ ਸੀ।
-
ਗੱਡੀ ਨੰਬਰ 12393 – ਸੰਪੂਰਨ ਕ੍ਰਾਂਤੀ ਐਕਸਪ੍ਰੈੱਸ: ਇਹ ਗੱਡੀ ਸਵੇਰੇ 7:55 ਵਜੇ ਨਵੀਂ ਦਿੱਲੀ ਪੁੱਜਣੀ ਸੀ।
-
ਗੱਡੀ ਨੰਬਰ 22361 – ਰਾਜੇਂਦਰ ਨਗਰ-ਨਵੀਂ ਦਿੱਲੀ ਅੰਮ੍ਰਿਤ ਭਾਰਤ ਐਕਸਪ੍ਰੈੱਸ: ਇਸ ਦੀ ਆਮਦ ਦੁਪਹਿਰ 1:10 ਵਜੇ ਤੈਅ ਸੀ।
ਸੂਚੀ ਵਿੱਚ ਸ਼ਾਮਲ ਇਹ ਸਾਰੀਆਂ ਚਾਰੇ ਸੇਵਾਵਾਂ ਪੂਰੀ ਤਰ੍ਹਾਂ ਰੱਦ ਰਹਿਣਗੀਆਂ। ਰੇਲਵੇ ਵਿਭਾਗ ਨੇ ਇਨ੍ਹਾਂ ਗੱਡੀਆਂ ਵਿੱਚ ਸੀਟਾਂ ਬੁੱਕ ਕਰਵਾਉਣ ਵਾਲੇ ਯਾਤਰੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਘਰੋਂ ਨਿਕਲਣ ਤੋਂ ਪਹਿਲਾਂ ‘ਰੇਲ ਵਨ’ (RailOne) ਜਾਂ ਨੈਸ਼ਨਲ ਟਰੇਨ ਇਨਕੁਆਰੀ ਸਿਸਟਮ (NTES) ਐਪਲੀਕੇਸ਼ਨ ਰਾਹੀਂ ਆਪਣੀ ਯਾਤਰਾ ਦੀ ਤਾਜ਼ਾ ਸਥਿਤੀ ਜ਼ਰੂਰ ਪਰਖ ਲੈਣ।
ਅਚਾਨਕ ਹੋਈ ਇਸ ਕਟੌਤੀ ਕਾਰਨ ਯਾਤਰੀਆਂ ਨੂੰ ਪੇਸ਼ ਆਉਣ ਵਾਲੀ ਦਿੱਕਤ ‘ਤੇ ਰੇਲ ਪ੍ਰਸ਼ਾਸਨ ਨੇ ਅਫ਼ਸੋਸ ਜ਼ਾਹਰ ਕੀਤਾ ਹੈ ਅਤੇ ਬਦਲਵੇਂ ਪ੍ਰਬੰਧਾਂ ਜਾਂ ਰਿਫੰਡ ਸੰਬੰਧੀ ਕਿਸੇ ਵੀ ਤਬਦੀਲੀ ਲਈ ਕੇਵਲ ਅਧਿਕਾਰਤ ਪੋਰਟਲਾਂ ‘ਤੇ ਹੀ ਭਰੋਸਾ ਕਰਨ ਦਾ ਸੁਝਾਅ ਦਿੱਤਾ ਹੈ।
