ਪੰਜਾਬ ਅਤੇ ਹਰਿਆਣਾ ਦੇ ਕੌਮੀ ਮਾਰਗਾਂ ’ਤੇ ਸਫ਼ਰ ਕਰਨ ਵਾਲੇ ਵਾਹਨ ਚਾਲਕਾਂ ਦੀਆਂ ਜੇਬਾਂ ’ਤੇ ਬੋਝ ਵਧ ਗਿਆ ਹੈ। ਨੈਸ਼ਨਲ ਹਾਈਵੇਅ ਅਥਾਰਟੀ ਆਫ ਇੰਡੀਆ (NHAI) ਨੇ ਦੋਵਾਂ ਰਾਜਾਂ ਦੇ ਅੱਠ ਵੱਡੇ ਟੋਲ ਪਲਾਜ਼ਿਆਂ ‘ਤੇ ਉਪਭੋਗਤਾ ਫੀਸ (ਟੋਲ ਟੈਕਸ) ਨੂੰ ਸੋਧਿਆ ਹੈ।
ਇਹ ਨਵੀਆਂ ਦਰਾਂ 14 ਜੁਲਾਈ ਤੋਂ ਲਾਗੂ ਹੋ ਗਈਆਂ ਹਨ। NHAI ਦੇ ਇਸ ਫੈਸਲੇ ਕਾਰਨ ਚੰਡੀਗੜ੍ਹ, ਲੁਧਿਆਣਾ, ਅੰਮ੍ਰਿਤਸਰ, ਬਠਿੰਡਾ ਅਤੇ ਸੰਗਰੂਰ ਸਮੇਤ ਪੰਜਾਬ ਦੇ ਕਈ ਮੁੱਖ ਮਾਰਗਾਂ ‘ਤੇ ਪ੍ਰਾਈਵੇਟ ਕਾਰਾਂ ਅਤੇ ਲਾਈਟ ਮੋਟਰ ਵਾਹਨਾਂ ਦੀ ਟੋਲ ਫੀਸ 5 ਰੁਪਏ ਤੋਂ ਵਧਾ ਕੇ 10 ਰੁਪਏ ਹੋ ਗਈ ਹੈ। ਸ਼ੇਖੂਪੁਰਾ ਟੋਲ (ਮੌੜ-ਰੋਮਾਣਾ ਮੰਡੀ) ‘ਤੇ ਕਾਰਾਂ ਨੂੰ 55 ਰੁਪਏ ਵਨ-ਵੇਅ ਅਤੇ ਰਾਊਂਡ ਟ੍ਰਿਪ ਲਈ 85 ਰੁਪਏ ਦੇਣੇ ਪੈਣਗੇ। ਇੱਥੋਂ ਦੇ ਲਹਿਰਾਬੇਗਾ ਟੋਲ (ਤਪਾ-ਬਠਿੰਡਾ) ‘ਤੇ ਕਾਰਾਂ ਦੀ ਫ਼ੀਸ ਇੱਕ ਪਾਸੇ ਲਈ 80 ਰੁਪਏ ਅਤੇ ਦੋ ਪਾਸੇ ਲਈ 120 ਰੁਪਏ ਰੱਖੀ ਗਈ ਹੈ। ਖੂਈਆਂ ਸਰਵਰ ਟੋਲ (ਮਲੋਟ-ਅਬੋਹਰ) ‘ਤੇ ਕਾਰਾਂ ਦੀ ਟੋਲ ਫ਼ੀਸ ਇੱਕ ਪਾਸੇ ਲਈ 105 ਰੁਪਏ ਅਤੇ ਦੋ ਪਾਸੇ ਲਈ 155 ਰੁਪਏ ਹੋਵੇਗੀ। ਕਾਲਾਝਾਰ ਟੋਲ (ਪਟਿਆਲਾ ਬਾਈਪਾਸ) ‘ਤੇ ਕਾਰਾਂ ਲਈ ਇਕ ਤਰਫਾ ਟੋਲ ₹115 ਅਤੇ ਰਾਊਂਡ-ਟਰਿੱਪ ₹175 ਹੋਵੇਗਾ। ਪਾਈਨ ਟੋਲ ਪਲਾਜ਼ਾ (ਸੰਗਰੂਰ-ਦੋਗਲ ਕਲਾਂ) ‘ਤੇ ਕਾਰਾਂ ਲਈ ਇਕ ਤਰਫਾ ਫੀਸ ₹95 ਅਤੇ ਦੋ-ਪੱਖੀ ਫੀਸ ₹145 ਹੈ। ਬੱਸਾਂ ਅਤੇ ਟਰੱਕਾਂ ਦੀ ਫੀਸ ਕ੍ਰਮਵਾਰ 325 ਰੁਪਏ ਅਤੇ 485 ਰੁਪਏ ਹੋਵੇਗੀ।
ਘੁਲਾਲ ਟੋਲ ਪਲਾਜ਼ਾ (ਚੰਡੀਗੜ੍ਹ-ਖਰੜ-ਲੁਧਿਆਣਾ) ਵਿਖੇ, ਇੱਥੇ ਕਾਰਾਂ ਲਈ ਇੱਕ ਤਰਫਾ ਟੋਲ ₹115 ਅਤੇ ਰਾਊਂਡ-ਟਰਿੱਪ ਟੋਲ ਨੂੰ ₹170 ਕਰ ਦਿੱਤਾ ਗਿਆ ਹੈ। ਬੱਸਾਂ ਅਤੇ ਟਰੱਕਾਂ ਦਾ ਕਿਰਾਇਆ ਕ੍ਰਮਵਾਰ 390 ਰੁਪਏ ਅਤੇ 580 ਰੁਪਏ ਹੋਵੇਗਾ। ਕੋਟ ਕਰੋੜ ਟੋਲ (ਅੰਮ੍ਰਿਤਸਰ-ਬਠਿੰਡਾ) ‘ਤੇ, ਕਾਰਾਂ ਲਈ ਇਕ ਤਰਫਾ ਫੀਸ ₹50 ਅਤੇ ਦੋਵੇਂ ਪਾਸੇ ₹70 ਰੱਖੀ ਗਈ ਹੈ। ਕਾਲਾ ਟਿੱਬਾ ਟੋਲ (ਅਬੋਹਰ-ਡੱਬਵਾਲੀ) ‘ਤੇ ਕਾਰਾਂ ਲਈ ਟੋਲ ₹50 ਇੱਕ ਤਰਫਾ ਅਤੇ ₹80 ਦੋਵੇਂ ਪਾਸੇ ਹੋਵੇਗਾ। ਇਹ ਬੱਸਾਂ/ਟਰੱਕਾਂ ਲਈ ₹175 ਅਤੇ ₹265 ਹੈ।
NHAI ਅਧਿਕਾਰੀਆਂ ਦੇ ਅਨੁਸਾਰ, ਇਹ ਸੰਸ਼ੋਧਨ ਥੋਕ ਮੁੱਲ ਸੂਚਕਾਂਕ (WPI) ਨਾਲ ਜੁੜੇ ਸੰਸ਼ੋਧਿਤ ਟੋਲ ਢਾਂਚੇ ਦੇ ਤਹਿਤ ਕੀਤਾ ਗਿਆ ਹੈ। ਪਿਛਲੇ ਸਾਲ ਕੁਝ ਥਾਵਾਂ ‘ਤੇ ਫੀਸ ਘਟਾਈ ਗਈ ਸੀ, ਜਿਸ ਨੂੰ ਹੁਣ ਸੋਧੇ ਹੋਏ ਸਿਸਟਮ ਅਨੁਸਾਰ ਬਹਾਲ ਕਰ ਦਿੱਤਾ ਗਿਆ ਹੈ। ਖੇਤਰ ਦੇ 50 ਤੋਂ ਵੱਧ ਟੋਲ ਪਲਾਜ਼ਿਆਂ ‘ਤੇ ਨਵੀਆਂ ਦਰਾਂ ਨੋਟੀਫਾਈ ਕੀਤੀਆਂ ਗਈਆਂ ਹਨ, ਹਾਲਾਂਕਿ ਜ਼ਿਆਦਾਤਰ ਥਾਵਾਂ ‘ਤੇ ਵਾਧਾ ਸੀਮਤ ਕੀਤਾ ਗਿਆ ਹੈ।