Punjab Weather Update Latest News Today in Punjabi: ਪਹਾੜੀ ਖੇਤਰਾਂ ਵਿੱਚ ਹੋਈ ਤਾਜ਼ਾ ਬਰਫ਼ਬਾਰੀ ਅਤੇ ਮੈਦਾਨੀ ਇਲਾਕਿਆਂ ਵਿੱਚ ਪਏ ਮੀਂਹ ਕਾਰਨ ਪੰਜਾਬ ਸਮੇਤ ਰਾਜਧਾਨੀ ਚੰਡੀਗੜ੍ਹ ਦੇ ਮੌਸਮ ਦਾ ਮਿਜ਼ਾਜ ਅਚਾਨਕ ਬਦਲ ਗਿਆ ਹੈ। ਸਵੇਰ ਅਤੇ ਦੇਰ ਸ਼ਾਮ ਵੇਲੇ ਹਵਾ ਵਿੱਚ ਘੁਲੀ ਠੰਢਕ ਨੇ ਲੋਕਾਂ ਨੂੰ ਗਰਮੀ ਅਤੇ ਹੁੰਮਸ ਤੋਂ ਵੱਡੀ ਰਾਹਤ ਦਿੱਤੀ ਹੈ। ਹਾਲਾਂਕਿ ਮੌਸਮ ਵਿਭਾਗ ਦਾ ਮੰਨਣਾ ਹੈ ਕਿ ਇਸ ਨੂੰ ਪੱਕੇ ਤੌਰ ‘ਤੇ ਸਰਦੀਆਂ ਦੀ ਸ਼ੁਰੂਆਤ ਨਹੀਂ ਕਿਹਾ ਜਾ ਸਕਦਾ, ਕਿਉਂਕਿ ਅਕਤੂਬਰ ਦੇ ਪਹਿਲੇ ਹਫ਼ਤੇ ਮਗਰੋਂ ਦਿਨ ਵੇਲੇ ਮੁੜ ਪਾਰਾ ਚੜ੍ਹਨ ਦੇ ਆਸਾਰ ਹਨ।
ਤਾਜ਼ਾ ਅੰਕੜਿਆਂ ਮੁਤਾਬਕ ਸੂਬੇ ਦੇ ਔਸਤਨ ਵੱਧ ਤੋਂ ਵੱਧ ਤਾਪਮਾਨ ਵਿੱਚ ਲਗਭਗ 2.1 ਡਿਗਰੀ ਸੈਲਸੀਅਸ ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ, ਜੋ ਕਿ ਆਮ ਨਾਲੋਂ 5.1 ਡਿਗਰੀ ਘੱਟ ਹੈ। ਬਠਿੰਡਾ 31.2 ਡਿਗਰੀ ਨਾਲ ਸਭ ਤੋਂ ਗਰਮ ਰਿਹਾ, ਜਦਕਿ ਚੰਡੀਗੜ੍ਹ ਦਾ ਵੱਧ ਤੋਂ ਵੱਧ ਤਾਪਮਾਨ 25.4 ਡਿਗਰੀ ਸੈਲਸੀਅਸ ਰਿਕਾਰਡ ਕੀਤਾ ਗਿਆ, ਜੋ ਆਮ ਨਾਲੋਂ 7.2 ਡਿਗਰੀ ਹੇਠਾਂ ਰਿਹਾ। ਸਤੰਬਰ ਮਹੀਨੇ ਦੌਰਾਨ ਸ਼ਹਿਰ ਵਿੱਚ ਪਿਛਲੇ ਕਈ ਵਰ੍ਹਿਆਂ ਦਾ ਇਹ ਸਭ ਤੋਂ ਠੰਢਾ ਦਿਨ ਮੰਨਿਆ ਜਾ ਰਿਹਾ ਹੈ।
ਏਸੀ ਬੰਦ ਹੋਣ ਨਾਲ ਬਿਜਲੀ ਮੰਗ ’ਚ ਵੱਡੀ ਕਮੀ
ਪਾਰੇ ਦੇ ਹੇਠਾਂ ਆਉਂਦਿਆਂ ਹੀ ਏਅਰ ਕੰਡੀਸ਼ਨਰਾਂ ਦੀ ਵਰਤੋਂ ਘਟ ਗਈ ਹੈ, ਜਿਸ ਨਾਲ ਪੰਜਾਬ ਵਿੱਚ ਬਿਜਲੀ ਦੀ ਮੰਗ ਧੜੰਮ ਕਰਕੇ ਡਿੱਗ ਪਈ। 26 ਸਤੰਬਰ ਨੂੰ ਬਿਜਲੀ ਦੀ ਮੰਗ ਜਿੱਥੇ 12,989 ਮੈਗਾਵਾਟ ਦੇ ਕਰੀਬ ਸੀ, ਉਹ ਮਹਿਜ਼ 72 ਘੰਟਿਆਂ ਵਿੱਚ 4,204 ਮੈਗਾਵਾਟ ਘਟ ਕੇ 8,785 ਮੈਗਾਵਾਟ ‘ਤੇ ਆ ਗਈ ਹੈ। ਮੰਗ ਵਿੱਚ ਆਈ ਇਸ ਭਾਰੀ ਕਮੀ ਕਾਰਨ ਪਾਵਰਕਾਮ ਨੂੰ ਬਾਹਰੀ ਸੂਬਿਆਂ ਤੋਂ ਮਹਿੰਗੇ ਭਾਅ ਦੀ ਵਾਧੂ ਬਿਜਲੀ ਖ਼ਰੀਦਣ ਦੇ ਦਬਾਅ ਤੋਂ ਮੁਕਤੀ ਮਿਲੀ ਹੈ। ਮੌਜੂਦਾ ਸਮੇਂ ਸੂਬਾ ਕੇਂਦਰੀ ਪੂਲ ਵਿੱਚੋਂ ਨਿਰਧਾਰਤ 3,448 ਮੈਗਾਵਾਟ ਦੇ ਮੁਕਾਬਲੇ ਲਗਭਗ 3,710 ਮੈਗਾਵਾਟ ਬਿਜਲੀ ਹੀ ਲੈ ਰਿਹਾ ਹੈ।
ਕਿੱਥੇ ਕਿੰਨੀ ਪਈ ਬਰਸਾਤ?
28 ਸਤੰਬਰ ਨੂੰ ਸੂਬੇ ਦੇ ਕਰੀਬ ਦਸ ਜ਼ਿਲ੍ਹਿਆਂ ਵਿੱਚ ਮੀਂਹ ਪਿਆ। ਸਭ ਤੋਂ ਵੱਧ 70 ਮਿਲੀਮੀਟਰ ਬਾਰਸ਼ ਹੁਸ਼ਿਆਰਪੁਰ ਜ਼ਿਲ੍ਹੇ ਵਿੱਚ ਹੋਈ। ਇਸ ਤੋਂ ਇਲਾਵਾ ਜਲੰਧਰ ਵਿੱਚ 26.5 ਮਿਲੀਮੀਟਰ, ਪਟਿਆਲਾ ਵਿੱਚ 19.2 ਮਿਲੀਮੀਟਰ, ਚੰਡੀਗੜ੍ਹ ਵਿੱਚ 9.4 ਮਿਲੀਮੀਟਰ ਅਤੇ ਮੋਹਾਲੀ ਵਿੱਚ 7.5 ਮਿਲੀਮੀਟਰ ਬਾਰਸ਼ ਰਿਕਾਰਡ ਕੀਤੀ ਗਈ। ਪਠਾਨਕੋਟ, ਲੁਧਿਆਣਾ, ਕਪੂਰਥਲਾ, ਰੂਪਨਗਰ ਅਤੇ ਸੰਗਰੂਰ ਵਿੱਚ ਵੀ ਹਲਕੀਆਂ ਫੁਹਾਰਾਂ ਪਈਆਂ।
ਮਾਨਸੂਨ ਦੀ ਮੁਕੰਮਲ ਰਵਾਨਗੀ ਨੇੜੇ
ਪੱਛਮੀ ਗੜਬੜੀ (ਵੈਸਟਰਨ ਡਿਸਟਰਬੈਂਸ) ਦੇ ਹੌਲੀ-ਹੌਲੀ ਅੱਗੇ ਨਿਕਲਣ ਅਤੇ ਉੱਤਰ-ਪੱਛਮੀ ਖ਼ੁਸ਼ਕ ਹਵਾਵਾਂ ਦੇ ਜ਼ੋਰ ਫੜਨ ਕਾਰਨ ਹੁਣ ਬੱਦਲਵਾਈ ਦੀ ਸੰਭਾਵਨਾ ਘਟੇਗੀ। ਮੌਸਮ ਮਾਹਿਰਾਂ ਅਨੁਸਾਰ ਖੇਤਰ ਵਿੱਚੋਂ ਮਾਨਸੂਨ ਦੀ ਵਾਪਸੀ ਪ੍ਰਕਿਰਿਆ ਲਗਭਗ ਅੰਤਿਮ ਪੜਾਅ ‘ਤੇ ਹੈ ਅਤੇ ਅਗਲੇ 24 ਤੋਂ 48 ਘੰਟਿਆਂ ਅੰਦਰ ਇਹ ਪੂਰੀ ਤਰ੍ਹਾਂ ਰੁਖ਼ਸਤ ਹੋ ਜਾਵੇਗਾ।
ਮੌਸਮ ਵਿਗਿਆਨੀ ਮਹੇਸ਼ ਪਲਾਵਤ ਨੇ ਦੱਸਿਆ ਕਿ ਪਹਾੜਾਂ ਵਿੱਚ ਹੋਈ ਬਰਫ਼ਬਾਰੀ ਦਾ ਅਸਰ ਸਵੇਰੇ-ਸ਼ਾਮ ਦੀ ਸੁਹਾਵਣੀ ਠੰਢਕ ਦੇ ਰੂਪ ਵਿੱਚ ਕੁਝ ਦਿਨ ਬਣਿਆ ਰਹੇਗਾ। ਹਾਲਾਂਕਿ ਅਕਤੂਬਰ ਦੇ ਦੂਜੇ ਹਫ਼ਤੇ ਤੋਂ ਦਿਨ ਵੇਲੇ ਚਮਕਦੀ ਧੁੱਪ ਕਾਰਨ ਵੱਧ ਤੋਂ ਵੱਧ ਤਾਪਮਾਨ ਮੁੜ 34 ਡਿਗਰੀ ਤੱਕ ਪਹੁੰਚ ਸਕਦਾ ਹੈ, ਜਦਕਿ ਘੱਟੋ-ਘੱਟ ਪਾਰਾ 24 ਡਿਗਰੀ ਦੇ ਆਸ-ਪਾਸ ਰਹੇਗਾ। ਅਕਤੂਬਰ ਦੇ ਅੱਧ ਤੱਕ ਜਾ ਕੇ ਹੀ ਮੌਸਮ ਵਿੱਚ ਸਥਾਈ ਤੌਰ ‘ਤੇ ਪੱਤਝੜ ਅਤੇ ਮੌਸਮੀ ਠੰਢ ਦਾ ਪੱਕਾ ਅਸਰ ਨਜ਼ਰ ਆਵੇਗਾ।
