Kashmir Encounter Latest News: ਮੱਧ ਕਸ਼ਮੀਰ ਦੇ ਉੱਚੇ ਪਹਾੜੀ ਜੰਗਲੀ ਇਲਾਕੇ ਵਿੱਚ ਸੁਰੱਖਿਆ ਬਲਾਂ ਵੱਲੋਂ ਚਲਾਏ ਗਏ ਇੱਕ ਅਹਿਮ ਆਪਰੇਸ਼ਨ ਦੌਰਾਨ ਪਾਕਿਸਤਾਨ ਆਧਾਰਿਤ ਲਸ਼ਕਰ-ਏ-ਤੋਇਬਾ (LeT) ਦਾ ਇੱਕ ਖ਼ਤਰਨਾਕ ਕਮਾਂਡਰ ਮਾਰਿਆ ਗਿਆ ਹੈ। ਫੌਜ ਦੇ ਸੀਨੀਅਰ ਅਧਿਕਾਰੀਆਂ ਅਨੁਸਾਰ ਇਸ ਕਾਰਵਾਈ ਨਾਲ ਜੰਮੂ-ਕਸ਼ਮੀਰ ਵਿੱਚ ਕਈ ਵੱਡੇ ਹਮਲਿਆਂ ਨੂੰ ਅੰਜਾਮ ਦੇਣ ਵਾਲਾ ਚਾਰ ਮੈਂਬਰੀ ਅੱਤਵਾਦੀ ਗਿਰੋਹ ਪੂਰੀ ਤਰ੍ਹਾਂ ਖ਼ਤਮ ਹੋ ਗਿਆ ਹੈ।
ਮੰਗਲਵਾਰ ਦੇਰ ਸ਼ਾਮ ਯੂਸਮਰਗ ਦੇ ਕੋਰਾਗ ਜੰਗਲ ਵਿੱਚ ਸੁਰੱਖਿਆ ਬਲਾਂ ਨੇ ਖੁਫ਼ੀਆ ਜਾਣਕਾਰੀ ਦੇ ਆਧਾਰ ‘ਤੇ ਘੇਰਾਬੰਦੀ ਕਰਕੇ ਤਲਾਸ਼ੀ ਮੁਹਿੰਮ ਵਿੱਢੀ ਸੀ। ਜਵਾਨਾਂ ਵੱਲੋਂ ਸ਼ੱਕੀ ਹਲਚਲ ਦੇਖੇ ਜਾਣ ‘ਤੇ ਚਿਤਾਵਨੀ ਦਿੱਤੀ ਗਈ, ਪਰ ਲੁਕੇ ਹੋਏ ਅੱਤਵਾਦੀਆਂ ਨੇ ਗੋਲੀਬਾਰੀ ਸ਼ੁਰੂ ਕਰ ਦਿੱਤੀ। ਜਵਾਬੀ ਕਾਰਵਾਈ ਵਿੱਚ ਇੱਕ ਅੱਤਵਾਦੀ ਢੇਰ ਹੋ ਗਿਆ। ਮੁੱਠਭੇੜ ਖ਼ਤਮ ਹੋਣ ਮਗਰੋਂ ਮਿਲੀ ਲਾਸ਼ ਦੀ ਪਛਾਣ ਮੁਹੰਮਦ ਆਸਿਫ਼ ਉਰਫ਼ ਹਾਸ਼ਿਮ ਮੂਸਾ ਵਜੋਂ ਹੋਈ, ਜੋ ਪਾਕਿਸਤਾਨ ਨਾਲ ਸੰਬੰਧਿਤ ਲਸ਼ਕਰ ਦਾ ਸਰਗਰਮ ਮੈਂਬਰ ਸੀ। ਘਟਨਾ ਸਥਾਨ ਤੋਂ ਭਾਰੀ ਮਾਤਰਾ ਵਿੱਚ ਗੋਲਾ-ਬਾਰੂਦ ਅਤੇ ਹਥਿਆਰ ਵੀ ਬਰਾਮਦ ਕੀਤੇ ਗਏ ਹਨ।
ਜਾਂਚ ਮੁਤਾਬਕ ਮੂਸਾ ਆਪਣੇ ਸਾਥੀ ਯਾਸਿਰ ਨਾਲ ਮਿਲ ਕੇ ਸਰਗਰਮੀਆਂ ਚਲਾ ਰਿਹਾ ਸੀ। ਯਾਸਿਰ ਨੂੰ ਪਹਿਲਾਂ ਹੀ ਇਸੇ ਜੰਗਲੀ ਪੱਟੀ ਵਿੱਚ ਹੋਏ ਇੱਕ ਮੁਕਾਬਲੇ ਦੌਰਾਨ ਮਾਰ ਮੁਕਾਇਆ ਗਿਆ ਸੀ। ਸੁਰੱਖਿਆ ਏਜੰਸੀਆਂ ਅਨੁਸਾਰ ਇਹ ਟੋਲੀ ਪੁੰਛ ਦੇ ਡੇਰਾ ਕੀ ਗਲੀ ਵਿਖੇ ਫੌਜ ‘ਤੇ ਹੋਏ ਉਸ ਘਾਤਕ ਹਮਲੇ ਵਿੱਚ ਸ਼ਾਮਲ ਸੀ ਜਿਸ ਵਿੱਚ ਚਾਰ ਜਵਾਨ ਸ਼ਹੀਦ ਹੋ ਗਏ ਸਨ। ਇਸ ਤੋਂ ਇਲਾਵਾ ਹਵਾਈ ਫੌਜ (ਏਅਰ ਫੋਰਸ) ਦੇ ਕਾਫ਼ਲੇ ਨੂੰ ਨਿਸ਼ਾਨਾ ਬਣਾਉਣ ਵਿੱਚ ਵੀ ਇਨ੍ਹਾਂ ਦਾ ਹੱਥ ਮੰਨਿਆ ਜਾਂਦਾ ਰਿਹਾ ਹੈ।
ਸੁਰੱਖਿਆ ਅਧਿਕਾਰੀਆਂ ਨੇ ਦੱਸਿਆ ਕਿ ਮੂਸਾ ਇਸ ਚਾਰ ਮੈਂਬਰੀ ਗਰੁੱਪ ਦੀ ਕਮਾਨ ਸੰਭਾਲ ਰਿਹਾ ਸੀ। ਇਸ ਗਿਰੋਹ ਦੇ ਬਾਕੀ ਤਿੰਨ ਸਾਥੀ—ਸੀਨੀਅਰ ਕਮਾਂਡਰ ਸੁਲੇਮਾਨ ਸ਼ਾਹ, ਜੁਨੈਦ ਅਹਿਮਦ ਭੱਟ ਅਤੇ ਯਾਸਿਰ—ਪਹਿਲਾਂ ਹੀ ਵੱਖ-ਵੱਖ ਮੁਕਾਬਲਿਆਂ ਵਿੱਚ ਮਾਰੇ ਜਾ ਚੁੱਕੇ ਹਨ। ਜ਼ਿਕਰਯੋਗ ਹੈ ਕਿ ਜੁਲਾਈ 2025 ਵਿੱਚ ਸੁਲੇਮਾਨ ਸ਼ਾਹ ਦੀ ਮੌਤ ਮਗਰੋਂ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਸੰਸਦ ਵਿੱਚ ਦੱਸਿਆ ਸੀ ਕਿ ਇਹ ਟੋਲੀ ਪਹਿਲਗਾਮ ਵਿੱਚ 25 ਸੈਲਾਨੀਆਂ ਅਤੇ ਇੱਕ ਸਥਾਨਕ ਨਾਗਰਿਕ ਦੀ ਜਾਨ ਲੈਣ ਵਾਲੇ ਕਤਲੇਆਮ ਵਿੱਚ ਵੀ ਸ਼ਾਮਲ ਸੀ।
ਇਸ ਤੋਂ ਇਲਾਵਾ ਇਹ ਗਿਰੋਹ ਅਕਤੂਬਰ 2024 ਦੇ ਗੰਦਰਬਲ ਸੁਰੰਗ ਹਮਲੇ ਅਤੇ ਗੁਲਮਰਗ ਦੇ ਬੂਟਾਪਥਰੀ ਹਮਲੇ ਵਿੱਚ ਵੀ ਸ਼ੱਕੀ ਰਿਹਾ ਸੀ, ਜਿੱਥੇ ਦੋ ਜਵਾਨਾਂ ਸਮੇਤ ਦੋ ਕੁਲੀਆਂ ਦੀ ਮੌਤ ਹੋਈ ਸੀ। ਗਿਰੋਹ ਦਾ ਇੱਕ ਹੋਰ ਮੈਂਬਰ ਜੁਨੈਦ ਦਸੰਬਰ 2024 ਵਿੱਚ ਹਰਵਾਨ ਖੇਤਰ ਵਿੱਚ ਮਾਰਿਆ ਗਿਆ ਸੀ। ਫੌਜ ਅਤੇ ਪੁਲਿਸ ਹੁਣ ਬਰਾਮਦ ਕੀਤੇ ਸਾਮਾਨ ਦੀ ਜਾਂਚ ਕਰ ਰਹੀ ਹੈ ਤਾਂ ਜੋ ਘਾਟੀ ਵਿੱਚ ਫੈਲੇ ਇਸ ਨੈੱਟਵਰਕ ਦੇ ਬਾਕੀ ਸੰਪਰਕਾਂ ਦਾ ਪਰਦਾਫਾਸ਼ ਕੀਤਾ ਜਾ ਸਕੇ।
