Nepal Floods 2026 Death Toll Latest News Today: ਪਿਛਲੇ ਮਹੀਨੇ 26 ਅਗਸਤ ਨੂੰ ਆਏ ਭਿਆਨਕ ਹੜ੍ਹਾਂ ਦੀ ਤਬਾਹੀ ਨਾਲ ਜੂਝ ਰਹੇ ਨੇਪਾਲ ਵਿੱਚ ਮੌਤਾਂ ਦਾ ਅੰਕੜਾ ਵੱਧ ਕੇ 1,344 ਹੋ ਗਿਆ ਹੈ। ਨੇਪਾਲ ਪੁਲਿਸ ਵੱਲੋਂ ਸ਼ਨੀਵਾਰ ਨੂੰ ਸਾਂਝੇ ਕੀਤੇ ਗਏ ਤਾਜ਼ਾ ਵੇਰਵਿਆਂ ਮੁਤਾਬਕ, ਬਚਾਅ ਕਾਰਜ ਜਾਰੀ ਰਹਿਣ ਦੇ ਨਾਲ-ਨਾਲ ਮਲਬੇ ‘ਚੋਂ ਲਾਸ਼ਾਂ ਮਿਲਣ ਦਾ ਸਿਲਸਿਲਾ ਰੁਕ ਨਹੀਂ ਰਿਹਾ। ਪਾਣੀ ਦੇ ਤੇਜ਼ ਵਹਾਅ ਨੇ ਨਾ ਸਿਰਫ਼ ਸੈਂਕੜੇ ਜ਼ਿੰਦਗੀਆਂ ਨਿਗਲ ਲਈਆਂ, ਸਗੋਂ ਪੁਲਾਂ, ਸੜਕਾਂ, ਬਿਜਲੀ ਘਰਾਂ ਅਤੇ ਪੀਣ ਵਾਲੇ ਸਾਫ਼ ਪਾਣੀ ਦੇ ਸਮੁੱਚੇ ਬੁਨਿਆਦੀ ਢਾਂਚੇ ਨੂੰ ਵੀ ਰੋੜ੍ਹ ਕੇ ਰੱਖ ਦਿੱਤਾ ਹੈ, ਜਿਸ ਨਾਲ ਪ੍ਰਭਾਵਿਤ ਖੇਤਰਾਂ ਵਿੱਚ ਮਨੁੱਖੀ ਸੰਕਟ ਹੋਰ ਡੂੰਘਾ ਹੋ ਗਿਆ ਹੈ।
ਜ਼ਿੰਦਗੀ ਦੀ ਜੱਦੋਜਹਿਦ ਵਿਚਾਲੇ ਸਿਹਤ ਵਿਭਾਗ ਲਈ ਨਵਾਂ ਸਿਰਦਰਦ ਖੜ੍ਹਾ ਹੋ ਗਿਆ ਹੈ। ਭੋਟੇਕੋਸ਼ੀ ਨਦੀ ਦੇ ਕੰਢੇ ਵਸੇ ਬਿਦੁਰ ਇਲਾਕੇ ਦੇ 15 ਪਾਣੀ ਦੇ ਸੋਮਿਆਂ ਦੀ ਜਾਂਚ ਦੌਰਾਨ 5 ਥਾਵਾਂ ‘ਤੇ ‘ਈ. ਕੋਲਾਈ’ (E. coli) ਬੈਕਟੀਰੀਆ ਦੀ ਪੁਸ਼ਟੀ ਹੋਈ ਹੈ। ਗੰਧਲੇ ਪਾਣੀ ਕਾਰਨ ਹੈਜ਼ਾ ਅਤੇ ਹੋਰ ਛੂਤ ਦੀਆਂ ਬਿਮਾਰੀਆਂ ਫੈਲਣ ਦੇ ਖ਼ਦਸ਼ੇ ਨੂੰ ਦੇਖਦਿਆਂ ਪ੍ਰਸ਼ਾਸਨ ਕਰੀਬ 1 ਲੱਖ ਲੋਕਾਂ ਨੂੰ ਹੈਜ਼ੇ ਦਾ ਟੀਕਾ ਅਤੇ 75 ਹਜ਼ਾਰ ਤੋਂ ਵੱਧ ਬੱਚਿਆਂ ਨੂੰ ਖ਼ਸਰੇ (ਮੀਜ਼ਲਜ਼) ਤੋਂ ਬਚਾਅ ਲਈ ਖ਼ੁਰਾਕਾਂ ਦੇਣ ਦੀ ਵਿਓਂਤਬੰਦੀ ਕਰ ਰਿਹਾ ਹੈ। ਸਿਹਤ ਮਾਹਿਰਾਂ ਦਾ ਕਹਿਣਾ ਹੈ ਕਿ ਗੰਦਗੀ ਅਤੇ ਦੂਸ਼ਿਤ ਪਾਣੀ ਕਾਰਨ ਬੱਚੇ ਅਤੇ ਬਜ਼ੁਰਗ ਸਭ ਤੋਂ ਵੱਧ ਜੋਖਮ ‘ਤੇ ਹਨ।
ਹੜ੍ਹਾਂ ਤੋਂ ਬਾਅਦ ਵਿਗੜੇ ਹਾਲਾਤ ਨੂੰ ਸੰਭਾਲਣ ਲਈ ਸਰਕਾਰ ਨੇ ਰਾਹਤ ਫੰਡ ਵੰਡਣੇ ਸ਼ੁਰੂ ਕਰ ਦਿੱਤੇ ਹਨ। ਕੌਮੀ ਆਫ਼ਤ ਜੋਖਮ ਨਿਊਨੀਕਰਨ ਅਤੇ ਪ੍ਰਬੰਧਨ ਅਥਾਰਟੀ (NDRRMA) ਨੇ ਰਸੂਵਾ ਅਤੇ ਨੁਵਾਕੋਟ ਜ਼ਿਲ੍ਹਿਆਂ ਨੂੰ 1-1 ਕਰੋੜ ਨੇਪਾਲੀ ਰੁਪਏ, ਜਦਕਿ ਧਾਦਿੰਗ ਲਈ 50 ਲੱਖ ਰੁਪਏ ਜਾਰੀ ਕੀਤੇ ਹਨ। ਇਸ ਤੋਂ ਇਲਾਵਾ 15 ਨੁਕਸਾਨੇ ਗਏ ਸਥਾਨਕ ਪ੍ਰਸ਼ਾਸਨਾਂ ਨੂੰ ਤੁਰੰਤ ਸਹਾਇਤਾ ਲਈ ਕੁੱਲ 13.5 ਕਰੋੜ ਨੇਪਾਲੀ ਰੁਪਏ ਮੁਹੱਈਆ ਕਰਵਾਏ ਗਏ ਹਨ ਤਾਂ ਜੋ ਮੁੱਢਲੀਆਂ ਸਹੂਲਤਾਂ ਦੀ ਬਹਾਲੀ ਤੇਜ਼ੀ ਨਾਲ ਹੋ ਸਕੇ।
ਭਾਰਤੀ ਟੀਮਾਂ ਸੁਰੰਗਾਂ ‘ਚ ਡਟੀਆਂ, ਕੌਮਾਂਤਰੀ ਪੱਧਰ ‘ਤੇ ਵੀ ਮਦਦ ਦੀ ਗੁਹਾਰ
ਰਾਹਤ ਮੁਹਿੰਮ ਵਿੱਚ ਭਾਰਤ ਦੀਆਂ ਵਿਸ਼ੇਸ਼ ਬਚਾਅ ਅਤੇ ਮੈਡੀਕਲ ਟੀਮਾਂ ਨੇਪਾਲੀ ਫ਼ੌਜ ਨਾਲ ਮਿਲ ਕੇ ਮੋਰਚਾ ਸੰਭਾਲ ਰਹੀਆਂ ਹਨ। ਨੇਪਾਲ ਵਿੱਚ ਭਾਰਤੀ ਰਾਜਦੂਤ ਨਵੀਨ ਸ੍ਰੀਵਾਸਤਵ ਅਨੁਸਾਰ ਭਾਰਤ ਨੇ ਸੁਰੰਗਾਂ ਵਿੱਚ ਫਸੇ ਲੋਕਾਂ ਨੂੰ ਕੱਢਣ ਵਾਲੇ ਮਾਹਿਰ ਜਵਾਨਾਂ ਦੇ ਨਾਲ-ਨਾਲ 19 ਮੈਂਬਰੀ ਫੋਰੈਂਸਿਕ ਟੀਮ ਵੀ ਤਾਇਨਾਤ ਕੀਤੀ ਹੈ। ਭਾਰਤ ਵੱਲੋਂ ਐਮਰਜੈਂਸੀ ਸਮੱਗਰੀ ਨਾਲ ਭਰੇ 5 ਰਾਹਤ ਜਹਾਜ਼ ਭੇਜੇ ਜਾ ਚੁੱਕੇ ਹਨ। ਦੂਜੇ ਪਾਸੇ, ਅਮਰੀਕਾ ਦੇ ਕੁਝ ਸੰਸਦ ਮੈਂਬਰਾਂ ਨੇ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਨੂੰ ਅਪੀਲ ਕੀਤੀ ਹੈ ਕਿ ਨੇਪਾਲ ਵਿੱਚ ਵਿਸ਼ੇਸ਼ ਆਫ਼ਤ ਰਿਸਪਾਂਸ ਟੀਮ (DART) ਭੇਜੀ ਜਾਵੇ ਅਤੇ ਮੁੜ-ਵਸੇਬੇ ਲਈ ਵੱਡੇ ਪੱਧਰ ‘ਤੇ ਮਾਲੀ ਮਦਦ ਉਲੀਕੀ ਜਾਵੇ।
ਬਚਾਅ ਦਲ ਫਿਲਹਾਲ ਮਲਬੇ ਹੇਠ ਦੱਬੇ ਲੋਕਾਂ ਦੀ ਭਾਲ ਅਤੇ ਜ਼ਿੰਦਗੀ ਲੀਹ ‘ਤੇ ਲਿਆਉਣ ਲਈ ਜੂਝ ਰਹੇ ਹਨ, ਜਦਕਿ ਸਰਕਾਰ ਸਾਹਮਣੇ ਪਿੰਡਾਂ ਦਾ ਮੁੜ-ਨਿਰਮਾਣ ਅਤੇ ਪੀਣ ਵਾਲੇ ਸਾਫ਼ ਪਾਣੀ ਦਾ ਪ੍ਰਬੰਧ ਕਰਨਾ ਸਭ ਤੋਂ ਵੱਡੀ ਚੁਣੌਤੀ ਬਣਿਆ ਹੋਇਆ ਹੈ।
