ਸ਼ਰਧਾ ਅਤੇ ਕੁਦਰਤ ਦਾ ਸੁਮੇਲ: ਟੇਮਜ਼ ਨਦੀ ਦੇ ਕੰਢੇ ਲੰਡਨ ਵਿੱਚ ਪਹਿਲੀ ਵਾਰ ਹੋਈ ਗੰਗਾ ਆਰਤੀ

Ganga Aarti Held for the First Time in London on the Banks of the River Thames: ਬਰਤਾਨੀਆ ਦੀ ਰਾਜਧਾਨੀ ਲੰਡਨ ਵਿੱਚ ਟੇਮਜ਼ ਨਦੀ ਦਾ ਕੰਢਾ ਐਤਵਾਰ ਨੂੰ ਇੱਕ ਇਤਿਹਾਸਕ ਹਿੰਦੂ ਧਾਰਮਿਕ ਸਮਾਗਮ ਦਾ ਗਵਾਹ ਬਣਿਆ, ਜਿੱਥੇ ਸ਼ਹਿਰ ਦੀ ਪਹਿਲੀ ਗੰਗਾ ਆਰਤੀ ਵਿੱਚ ਸ਼ਾਮਲ ਹੋਣ ਲਈ ਹਜ਼ਾਰਾਂ ਦੀ ਗਿਣਤੀ ਵਿੱਚ ਸ਼ਰਧਾਲੂ ਇਕੱਠੇ ਹੋਏ।

ਸਾਲਾਨਾ ‘ਟੋਟਲੀ ਟੇਮਜ਼’ (Totally Thames) ਫੈਸਟੀਵਲ ਦੇ ਸਹਿਯੋਗ ਨਾਲ ਚਿਨਮਯ ਮਿਸ਼ਨ ਯੂਕੇ ਵੱਲੋਂ ਕਰਵਾਇਆ ਗਿਆ ਇਹ ਸਮਾਗਮ ਭਾਰਤ ਦੀ ਰਵਾਇਤੀ ਦੀਪਮਾਲਾ ਅਤੇ ਅਰਦਾਸ ਦੀ ਪਰੰਪਰਾ ਨੂੰ ਬਰਤਾਨਵੀ ਧਰਤੀ ‘ਤੇ ਲੈ ਕੇ ਆਇਆ। ਇਹ ਆਯੋਜਨ ਚਿਨਮਯ ਮਿਸ਼ਨ ਦੀ ਸਥਾਪਨਾ ਦੇ 75 ਵਰ੍ਹੇ ਪੂਰੇ ਹੋਣ ਦੇ ਜਸ਼ਨਾਂ ਦਾ ਵੀ ਅਹਿਮ ਹਿੱਸਾ ਸੀ।

‘ਗੰਗਾ ਆਰਤੀ ਆਨ ਦ ਟੇਮਜ਼: ਅ ਸੈਰੇਮਨੀ ਆਫ਼ ਲਾਈਟ’ ਸਿਰਲੇਖ ਹੇਠ ਕਰਵਾਏ ਗਏ ਇਸ ਸਮਾਗਮ ਦੀ ਪ੍ਰੇਰਨਾ ਭਾਰਤ ਵਿੱਚ ਗੰਗਾ ਨਦੀ ਦੇ ਕੰਢਿਆਂ ‘ਤੇ ਸਦੀਆਂ ਤੋਂ ਚੱਲਦੀ ਆ ਰਹੀ ਆਰਤੀ ਦੀ ਪਰੰਪਰਾ ਤੋਂ ਲਈ ਗਈ ਸੀ। ਪ੍ਰਬੰਧਕਾਂ ਅਨੁਸਾਰ, ਲੰਡਨ ਵਿੱਚ ਇਸ ਸਮਾਗਮ ਦਾ ਮੁੱਖ ਮਕਸਦ ਕੁਦਰਤ ਅਤੇ ਜੀਵਨ ਨੂੰ ਚਲਾਉਣ ਵਾਲੀਆਂ ਕੁਦਰਤੀ ਸ਼ਕਤੀਆਂ ਪ੍ਰਤੀ ਸ਼ੁਕਰਗੁਜ਼ਾਰੀ ਦਾ ਸੁਨੇਹਾ ਦੇਣਾ ਸੀ।

ਇਸ ਵਿਸ਼ੇਸ਼ ਆਰਤੀ ਦੌਰਾਨ ਵੱਡੇ ਬਹੁ-ਮੰਜ਼ਿਲੇ ਤੇਲ ਦੇ ਦੀਵੇ, ਭਗਤੀ ਸੰਗੀਤ, ਪ੍ਰਾਰਥਨਾਵਾਂ ਅਤੇ ਮੰਤਰਾਂ ਦੇ ਉਚਾਰਨ ਨਾਲ ਪੂਰਾ ਮਾਹੌਲ ਗੂੰਜ ਉੱਠਿਆ। ਹਿੰਦੂ ਪਰੰਪਰਾ ਵਿੱਚ ਇਹ ਰਸਮ ਜੀਵਨਦਾਇਨੀ ਗੰਗਾ ਨਦੀ ਪ੍ਰਤੀ ਸ਼ਰਧਾ ਪ੍ਰਗਟਾਉਣ ਦੇ ਨਾਲ-ਨਾਲ ਸਮੁੱਚੀ ਕੁਦਰਤ ਦੀ ਮਹੱਤਤਾ ਨੂੰ ਸਵੀਕਾਰ ਕਰਨ ਦਾ ਪ੍ਰਤੀਕ ਹੈ।

ਚਿਨਮਯ ਮਿਸ਼ਨ ਯੂਕੇ ਦੀ ਰੈਜ਼ੀਡੈਂਟ ਟੀਚਰ ਬ੍ਰਹਮਚਾਰਿਣੀ ਸ਼੍ਰੀਪ੍ਰਿਆ ਚੈਤੰਨਿਆ ਨੇ ਦੱਸਿਆ ਕਿ ਇਸ ਸਮਾਗਮ ਦੀ ਰੂਪ-ਰੇਖਾ ਆਪਸੀ ਸ਼ੁਕਰਾਨੇ ਦੀ ਸਾਂਝੀ ਭਾਵਨਾ ਰਾਹੀਂ ਲੋਕਾਂ ਨੂੰ ਇੱਕ ਮੰਚ ‘ਤੇ ਜੋੜਨ ਲਈ ਤਿਆਰ ਕੀਤੀ ਗਈ ਸੀ।

ਉਨ੍ਹਾਂ ਕਿਹਾ ਕਿ ਪੀੜ੍ਹੀਆਂ ਤੋਂ ਸ਼ਰਧਾਲੂ ਨਦੀ ਅਤੇ ਕੁਦਰਤੀ ਸੰਸਾਰ ਦੇ ਉਪਕਾਰਾਂ ਦਾ ਧੰਨਵਾਦ ਕਰਨ ਲਈ ਗੰਗਾ ਕੰਢੇ ਦੀਪ ਪ੍ਰਜਵਲਿਤ ਕਰਦੇ ਆ ਰਹੇ ਹਨ। ਟੇਮਜ਼ ਕੰਢੇ ਇਸ ਪਰੰਪਰਾ ਨੂੰ ਲਿਆਉਣਾ ਭੂਗੋਲਿਕ ਸਰਹੱਦਾਂ ਤੋਂ ਪਾਰ “ਸ਼ੁਕਰਾਨੇ, ਉਮੀਦ ਅਤੇ ਏਕਤਾ” ਦੀ ਇਸ ਭਾਵਨਾ ਨੂੰ ਸਾਂਝਾ ਕਰਨ ਦਾ ਇੱਕ ਉਪਰਾਲਾ ਸੀ।

ਇਹ ਸਮਾਗਮ ਚਿਨਮਯ ਮਿਸ਼ਨ ਦੀ ਵਿਚਾਰਧਾਰਾ ਅਤੇ ਅਧਿਆਤਮਿਕ ਪਰੰਪਰਾ ਦੇ ਨਜ਼ਰੀਏ ਤੋਂ ਵੀ ਵਿਸ਼ੇਸ਼ ਅਹਿਮੀਅਤ ਰੱਖਦਾ ਹੈ। ਚੈਤੰਨਿਆ ਅਨੁਸਾਰ, ਗੰਗਾ ਨੂੰ ਗਿਆਨ ਦੇ ਨਿਰੰਤਰ ਵਹਾਅ ਦਾ ਪ੍ਰਤੀਕ ਵੀ ਮੰਨਿਆ ਜਾਂਦਾ ਹੈ। ਇਹ ਪ੍ਰਤੀਕ ਸੰਸਥਾ ਦੀ 75ਵੀਂ ਵਰ੍ਹੇਗੰਢ ਨਾਲ ਸਿੱਧਾ ਜੁੜਦਾ ਹੈ। ਮਿਸ਼ਨ ਦੇ ਬਾਨੀ ਸਵਾਮੀ ਚਿਨਮਯਾਨੰਦ ਨੇ ਹਿਮਾਲਿਆ ਦੀ ਪਰੰਪਰਾ ਵਿੱਚੋਂ ਵੇਦਾਂਤ ਦੀਆਂ ਸਿੱਖਿਆਵਾਂ ਨੂੰ ਆਮ ਸੰਸਾਰ ਵਿੱਚ ਲਿਆਉਣ ਅਤੇ ਰੋਜ਼ਮੱਰਾ ਦੇ ਜੀਵਨ ਨਾਲ ਜੋੜਨ ਲਈ ਆਪਣਾ ਜੀਵਨ ਸਮਰਪਿਤ ਕੀਤਾ ਸੀ। ਮਿਸ਼ਨ ਮੁਤਾਬਕ, ਵਰ੍ਹੇਗੰਢ ਅਤੇ ਟੇਮਜ਼ ਆਰਤੀ ਨੇ ਮਿਲ ਕੇ ਗਿਆਨ, ਸੇਵਾ ਅਤੇ ਸ਼ੁਕਰਾਨੇ ਦੇ ਉਨ੍ਹਾਂ ਮੂਲ ਸਿਧਾਂਤਾਂ ਨੂੰ ਉਭਾਰਨ ਦਾ ਮੌਕਾ ਦਿੱਤਾ ਜੋ ਸੰਸਥਾ ਦੀ ਪਛਾਣ ਰਹੇ ਹਨ।

ਇਸ ਆਯੋਜਨ ਦੌਰਾਨ ਵਾਤਾਵਰਣ ਦੀ ਸੰਭਾਲ ਵੱਲ ਵੀ ਵਿਸ਼ੇਸ਼ ਧਿਆਨ ਦਿੱਤਾ ਗਿਆ। ਪ੍ਰਬੰਧਕਾਂ ਨੇ ਸਪੱਸ਼ਟ ਕੀਤਾ ਕਿ ਸਮੁੱਚੀ ਰਸਮ ਸਿਰਫ਼ ਨਦੀ ਦੇ ਕੰਢੇ ਤੋਂ ਹੀ ਨਿਭਾਈ ਗਈ ਅਤੇ ਪੂਜਾ ਨਾਲ ਸਬੰਧਤ ਕੋਈ ਵੀ ਸਮੱਗਰੀ ਟੇਮਜ਼ ਨਦੀ ਵਿੱਚ ਜਲ-ਪ੍ਰਵਾਹ ਨਹੀਂ ਕੀਤੀ ਗਈ।

ਆਰਤੀ ਦੇ ਦੀਵੇ ਨਦੀ ਦੇ ਪਾਣੀ ਵਿੱਚ ਤਾਰਨ ਦੀ ਬਜਾਏ ਸੁੱਕੀ ਜ਼ਮੀਨ ‘ਤੇ ਹੀ ਰੱਖੇ ਗਏ। ਪ੍ਰਬੰਧਕਾਂ ਮੁਤਾਬਕ, ਇਸ ਢੰਗ ਨਾਲ ਨਦੀ ਦੇ ਵਹਾਅ ਜਾਂ ਵਾਤਾਵਰਣ ਨੂੰ ਕਿਸੇ ਵੀ ਤਰ੍ਹਾਂ ਦਾ ਨੁਕਸਾਨ ਪਹੁੰਚਾਏ ਬਿਨਾਂ ਪਰੰਪਰਾ ਦੀ ਪਵਿੱਤਰਤਾ ਨੂੰ ਕਾਇਮ ਰੱਖਿਆ ਗਿਆ। ਨਾਲ ਹੀ ਕੂੜੇ ਨੂੰ ਘਟਾਉਣ ਅਤੇ ਸਿੰਗਲ-ਯੂਜ਼ ਪਲਾਸਟਿਕ ਦੀ ਵਰਤੋਂ ਤੋਂ ਗੁਰੇਜ਼ ਕਰਨ ਲਈ ਪੁਖ਼ਤਾ ਕਦਮ ਚੁੱਕੇ ਗਏ, ਜੋ ਕੁਦਰਤ ਪ੍ਰਤੀ ਸਤਿਕਾਰ ਦੀ ਭਾਵਨਾ ਨੂੰ ਦਰਸਾਉਂਦੇ ਹਨ।

ਇਸ ਇਕੱਠ ਨੇ ਲੰਡਨ ਲਈ ਇੱਕ ਨਿਵੇਕਲੇ ਸੱਭਿਆਚਾਰਕ ਪਲ ਦੀ ਸਿਰਜਣਾ ਕੀਤੀ, ਜਿਸ ਨੇ ਭਾਰਤ ਦੀ ਪਾਵਨ ਗੰਗਾ ਨਾਲ ਜੁੜੀ ਪਰੰਪਰਾ ਨੂੰ ਬਰਤਾਨੀਆ ਦੀ ਇਤਿਹਾਸਕ ਨਦੀ ਦੇ ਤੱਟ ‘ਤੇ ਲਿਆ ਖੜ੍ਹਾ ਕੀਤਾ। ਧਾਰਮਿਕ ਪਹਿਲੂ ਤੋਂ ਇਲਾਵਾ, ਪ੍ਰਬੰਧਕਾਂ ਨੇ ਇਸ ਸਮਾਰੋਹ ਨੂੰ ਕੁਦਰਤ, ਭਾਈਚਾਰਕ ਸਾਂਝ ਅਤੇ ਸ਼ੁਕਰਾਨੇ ਦੇ ਸਦੀਵੀ ਮੁੱਲਾਂ ‘ਤੇ ਵਿਚਾਰ ਕਰਨ ਦੇ ਇੱਕ ਮੰਚ ਵਜੋਂ ਪੇਸ਼ ਕੀਤਾ।