US Air Force recalls bombers from military base in Britain: ਬ੍ਰਿਟੇਨ ਵਿਚਲੇ ਇੱਕ ਅਹਿਮ ਹਵਾਈ ਫ਼ੌਜ ਅੱਡੇ ‘ਤੇ ਸੰਭਾਵੀ ਦਹਿਸ਼ਤੀ ਹਮਲੇ ਦੀ ਸਾਜ਼ਿਸ਼ ਬੇਨਕਾਬ ਹੋਣ ਤੋਂ ਬਾਅਦ ਅਮਰੀਕੀ ਹਵਾਈ ਫ਼ੌਜ ਨੇ ਸੁਰੱਖਿਆ ਦੇ ਮੱਦੇਨਜ਼ਰ ਉੱਥੇ ਤਾਇਨਾਤ ਆਪਣੇ ਬੰਬਾਰ ਜਹਾਜ਼ਾਂ (Bombers) ਨੂੰ ਤੁਰੰਤ ਵਾਪਸ ਆਪਣੇ ਦੇਸ਼ ਸੱਦ ਲਿਆ ਹੈ।
ਇਹ ਲੜਾਕੂ ਜਹਾਜ਼ ਗਲੋਸਟਰਸ਼ਾਇਰ ਸਥਿਤ ‘ਆਰਏਐੱਫ ਫੇਅਰਫੋਰਡ’ (RAF Fairford) ਏਅਰਬੇਸ ਤੋਂ ਕਾਰਜਸ਼ੀਲ ਸਨ। ਅਮਰੀਕੀ ਫ਼ੌਜ ਦੇ ਪ੍ਰਬੰਧ ਹੇਠ ਚੱਲਣ ਵਾਲਾ ਇਹ ਬੇਸ ਪੱਛਮੀ ਏਸ਼ੀਆ ਅਤੇ ਖ਼ਾਸ ਤੌਰ ‘ਤੇ ਈਰਾਨ ਖ਼ਿਲਾਫ਼ ਕੀਤੀਆਂ ਗਈਆਂ ਕਾਰਵਾਈਆਂ ਸਮੇਤ ਕਈ ਵੱਡੇ ਫ਼ੌਜੀ ਮਿਸ਼ਨਾਂ ਦਾ ਮੁੱਖ ਗੜ੍ਹ ਰਿਹਾ ਹੈ। ਸੁਰੱਖਿਆ ਏਜੰਸੀਆਂ ਵੱਲੋਂ ਇਸ ਅੱਡੇ ਨੂੰ ਨਿਸ਼ਾਨਾ ਬਣਾਉਣ ਦੀ ਸਾਜ਼ਿਸ਼ ਦੀ ਭਿਣਕ ਲੱਗਣ ਮਗਰੋਂ ਉੱਥੇ ਤਾਇਨਾਤ ਫ਼ੌਜੀ ਜਵਾਨਾਂ ਅਤੇ ਸੰਵੇਦਨਸ਼ੀਲ ਜੰਗੀ ਸਾਜ਼ੋ-ਸਾਮਾਨ ਦੀ ਸੁਰੱਖਿਆ ਦੀ ਸਮੀਖਿਆ ਸ਼ੁਰੂ ਕਰ ਦਿੱਤੀ ਗਈ ਹੈ।
ਰਣਨੀਤਕ ਤੌਰ ‘ਤੇ ਅਹਿਮ ਮੰਨਿਆ ਜਾਂਦਾ ਹੈ ਇਹ ਏਅਰਬੇਸ
ਯੂਰਪ ਵਿੱਚ ਅਮਰੀਕੀ ਹਵਾਈ ਫ਼ੌਜ ਦੀਆਂ ਸਰਗਰਮੀਆਂ ਲਈ ‘ਆਰਏਐੱਫ ਫੇਅਰਫੋਰਡ’ ਲੰਬੇ ਸਮੇਂ ਤੋਂ ਇੱਕ ਮਜ਼ਬੂਤ ਲਾਂਚਪੈਡ ਰਿਹਾ ਹੈ। ਇੱਥੋਂ ਦਾ ਬੁਨਿਆਦੀ ਢਾਂਚਾ ਅਮਰੀਕੀ ਲੰਬੀ ਦੂਰੀ ਦੇ ਹਵਾਈ ਹਮਲਿਆਂ ਅਤੇ ਰਣਨੀਤਕ ਅਪਰੇਸ਼ਨਾਂ ਲਈ ਬਹੁਤ ਮਹੱਤਵਪੂਰਨ ਮੰਨਿਆ ਜਾਂਦਾ ਹੈ। ਰੱਖਿਆ ਮਾਹਿਰਾਂ ਅਨੁਸਾਰ ਜਹਾਜ਼ਾਂ ਨੂੰ ਵਾਪਸ ਸੱਦਣ ਦਾ ਮਤਲਬ ਇਸ ਅੱਡੇ ਨੂੰ ਪੱਕੇ ਤੌਰ ‘ਤੇ ਬੰਦ ਕਰਨਾ ਨਹੀਂ ਹੈ, ਸਗੋਂ ਜਦੋਂ ਤੱਕ ਸਾਜ਼ਿਸ਼ ਦੀ ਡੂੰਘਾਈ ਨਾਲ ਜਾਂਚ ਚੱਲ ਰਹੀ ਹੈ, ਓਨਾ ਚਿਰ ਸੁਰੱਖਿਆ ਪ੍ਰਬੰਧਾਂ ਨੂੰ ਮਜ਼ਬੂਤ ਕਰਨ ਲਈ ਇਹ ਇਹਤਿਆਤੀ ਕਦਮ ਚੁੱਕਿਆ ਗਿਆ ਹੈ।
ਜਾਂਚ ਜਾਰੀ, ਵੇਰਵੇ ਰੱਖੇ ਗਏ ਗੁਪਤ
ਹਵਾਈ ਅੱਡੇ ਨੂੰ ਨਿਸ਼ਾਨਾ ਬਣਾਉਣ ਵਾਲੀ ਇਸ ਸਾਜ਼ਿਸ਼ ਦੇ ਸਰੋਤਾਂ, ਇਸ ਦੇ ਖ਼ਤਰੇ ਦੇ ਪੱਧਰ ਅਤੇ ਇਸ ਮਾਮਲੇ ਵਿੱਚ ਹੋਈਆਂ ਗ੍ਰਿਫ਼ਤਾਰੀਆਂ ਬਾਰੇ ਸੁਰੱਖਿਆ ਅਧਿਕਾਰੀਆਂ ਨੇ ਅਜੇ ਪੂਰੇ ਵੇਰਵੇ ਜਨਤਕ ਨਹੀਂ ਕੀਤੇ ਹਨ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪੜਤਾਲ ਅੱਗੇ ਵਧਣ ਦੇ ਨਾਲ ਹੋਰ ਜਾਣਕਾਰੀ ਸਾਂਝੀ ਕੀਤੀ ਜਾਵੇਗੀ।
ਇਸ ਘਟਨਾ ਨੇ ਵਿਦੇਸ਼ਾਂ ਵਿੱਚ ਮੌਜੂਦ ਅਮਰੀਕੀ ਫ਼ੌਜੀ ਟਿਕਾਣਿਆਂ ਦੀ ਸੁਰੱਖਿਆ ਨੂੰ ਲੈ ਕੇ ਵੱਡੀ ਚਿੰਤਾ ਖੜ੍ਹੀ ਕਰ ਦਿੱਤੀ ਹੈ। ਕਿਉਂਕਿ ਇਹ ਏਅਰਬੇਸ ਵੱਡੇ ਫ਼ੌਜੀ ਮਿਸ਼ਨਾਂ ਦਾ ਕੇਂਦਰ ਰਿਹਾ ਹੈ, ਇਸ ਲਈ ਜੇਕਰ ਬੰਬਾਰ ਜਹਾਜ਼ਾਂ ਦੀ ਵਾਪਸੀ ਲੰਬੇ ਸਮੇਂ ਤੱਕ ਰਹਿੰਦੀ ਹੈ, ਤਾਂ ਇਸ ਨਾਲ ਯੂਰਪ ਵਿੱਚ ਅਮਰੀਕਾ ਦੀ ਰਣਨੀਤਕ ਫ਼ੌਜੀ ਮੌਜੂਦਗੀ ਅਤੇ ਕਾਰਵਾਈ ਸਮਰੱਥਾ ‘ਤੇ ਵੀ ਅਸਰ ਪੈ ਸਕਦਾ ਹੈ। ਫ਼ਿਲਹਾਲ ਜਾਂਚ ਏਜੰਸੀਆਂ ਦੀ ਮੁੱਖ ਤਰਜੀਹ ਸੰਭਾਵੀ ਖ਼ਤਰੇ ਨੂੰ ਟਾਲਣਾ ਅਤੇ ਅੱਡੇ ਦੀ ਸੁਰੱਖਿਆ ਨੂੰ ਪੁਖ਼ਤਾ ਕਰਨਾ ਹੈ।
