ਅਮਰੀਕਾ ਮੰਦਹਾਲੀ ’ਚੋਂ ਨਿਕਲ ਕੇ ‘ਸੁਨਹਿਰੀ ਦੌਰ’ ਵੱਲ ਵਧਿਆ: ਡੋਨਲਡ ਟਰੰਪ ਵੱਲੋਂ ਵੱਡੀਆਂ ਆਰਥਿਕ ਤੇ ਫ਼ੌਜੀ ਪ੍ਰਾਪਤੀਆਂ ਦੇ ਦਾਅਵੇ

Donald Trump on US’ Golden Age Latest News: ਅਮਰੀਕੀ ਸਦਰ ਡੋਨਲਡ ਟਰੰਪ ਨੇ ਆਪਣੇ ਕਾਰਜਕਾਲ ਨੂੰ ਮੁਲਕ ਦੀ ਕਿਸਮਤ ਬਦਲਣ ਵਾਲਾ ਅਹਿਦ ਦੱਸਦਿਆਂ ਆਖਿਆ ਹੈ ਕਿ ਸੰਯੁਕਤ ਰਾਜ ਅਮਰੀਕਾ ਨਿਘਾਰ ਦੇ ਦੌਰ ਨੂੰ ਪਿੱਛੇ ਛੱਡ ਕੇ ਹੁਣ ਇੱਕ ‘ਸੁਨਹਿਰੀ ਯੁੱਗ’ ਵਿੱਚ ਕਦਮ ਰੱਖ ਚੁੱਕਾ ਹੈ। ਵ੍ਹਾਈਟ ਹਾਊਸ ਦੀਆਂ ਪ੍ਰਾਪਤੀਆਂ ਗਿਣਾਉਂਦਿਆਂ ਟਰੰਪ ਨੇ ਜ਼ੋਰ ਦੇ ਕੇ ਕਿਹਾ ਕਿ ਵੋਟਰਾਂ ਨੇ ਉਨ੍ਹਾਂ ਨੂੰ ਮੁਲਕ ਨੂੰ ਸੰਕਟ ਵਿੱਚੋਂ ਕੱਢਣ ਦੀ ਜ਼ਿੰਮੇਵਾਰੀ ਸੌਂਪੀ ਸੀ, ਅਤੇ ਉਨ੍ਹਾਂ ਨੇ ਚੋਣ ਮੁਹਿੰਮ ਵੇਲੇ ਕੀਤਾ ਇੱਕ-ਇੱਕ ਅਹਿਮ ਵਾਅਦਾ ਜ਼ਮੀਨੀ ਪੱਧਰ ’ਤੇ ਨਿਭਾਇਆ ਹੈ।

ਜੋਅ ਬਾਇਡਨ ਦੀਆਂ ਨੀਤੀਆਂ ’ਤੇ ਵਰ੍ਹੇ; ਸ਼ਹਿਰਾਂ ਵਿੱਚ ਅਰਾਜਕਤਾ ਲਈ ਡੈਮੋਕ੍ਰੇਟਸ ਨੂੰ ਦੱਸਿਆ ਜ਼ਿੰਮੇਵਾਰ

ਸਾਬਕਾ ਰਾਸ਼ਟਰਪਤੀ ਜੋਅ ਬਾਇਡਨ ਅਤੇ ਡੈਮੋਕ੍ਰੇਟਿਕ ਪਾਰਟੀ ਨੂੰ ਨਿਸ਼ਾਨੇ ’ਤੇ ਲੈਂਦਿਆਂ ਟਰੰਪ ਨੇ ਦੋਸ਼ ਲਾਇਆ ਕਿ ਪਿਛਲੀ ਸਰਕਾਰ ਦੀਆਂ ਗ਼ਲਤ ਨੀਤੀਆਂ ਨੇ ਮੁਲਕ ਨੂੰ ਆਰਥਿਕ ਅਤੇ ਸਮਾਜਿਕ ਖੜੋਤ ਵਿੱਚ ਧੱਕ ਦਿੱਤਾ ਸੀ। ਉਨ੍ਹਾਂ ਦਲੀਲ ਦਿੱਤੀ ਕਿ ਪਿਛਲੇ ਦੌਰ ਦੌਰਾਨ ਰਿਕਾਰਡ ਤੋੜ ਮਹਿੰਗਾਈ ਵਧੀ, ਜਦਕਿ ਸ਼ਹਿਰੀ ਖੇਤਰਾਂ ਵਿੱਚ ਅਪਰਾਧ, ਗ਼ਰੀਬੀ ਅਤੇ ਬਦਅਮਨੀ ਦਾ ਬੋਲਬਾਲਾ ਰਿਹਾ। ਟਰੰਪ ਮੁਤਾਬਕ ਖੱਬੇ-ਪੱਖੀ ਧੜੇ ਦੇ ਫ਼ੈਸਲਿਆਂ ਨੇ ਕੌਮਾਂਤਰੀ ਪੱਧਰ ’ਤੇ ਅਮਰੀਕਾ ਦੀ ਸਾਖ਼ ਨੂੰ ਭਾਰੀ ਢਾਹ ਲਾਈ, ਪਰ ਉਨ੍ਹਾਂ ਦੀ ਅਗਵਾਈ ਹੇਠ ਮਹਿਜ਼ ਦੋ ਵਰ੍ਹਿਆਂ ਅੰਦਰ ਮੁਲਕ ਦਾ ਮੁਹਾਂਦਰਾ ਪੂਰੀ ਤਰ੍ਹਾਂ ਬਦਲ ਗਿਆ ਹੈ।

ਟੈਕਸਾਂ ਵਿੱਚ ਵੱਡੀ ਛੋਟ ਅਤੇ ਫ਼ੌਜ ਦੇ ਆਧੁਨਿਕੀਕਰਨ ਦਾ ਉਭਾਰਿਆ ਮੁੱਦਾ

ਆਪਣੇ ਆਰਥਿਕ ਰੋਡਮੈਪ ਦਾ ਖ਼ੁਲਾਸਾ ਕਰਦਿਆਂ ਟਰੰਪ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਦੀ ਸਰਕਾਰ ਨੇ ਅਮਰੀਕੀ ਇਤਿਹਾਸ ਦੀਆਂ ਸਭ ਤੋਂ ਵੱਡੀਆਂ ਟੈਕਸ ਕਟੌਤੀਆਂ ਲਾਗੂ ਕੀਤੀਆਂ ਅਤੇ ਕਾਰੋਬਾਰਾਂ ’ਤੇ ਲੱਗੀਆਂ ਬੇਲੋੜੀਆਂ ਸਰਕਾਰੀ ਪਾਬੰਦੀਆਂ ਨੂੰ ਖ਼ਤਮ ਕੀਤਾ।

ਇਸ ਦੇ ਨਾਲ ਹੀ, ਹਥਿਆਰਬੰਦ ਸੈਨਾਵਾਂ ਦੇ ਬਜਟ ਵਿੱਚ ਵਾਧਾ ਕਰਕੇ ਫ਼ੌਜੀ ਤਾਕਤ ਨੂੰ ਮਜ਼ਬੂਤ ਕਰਨਾ ਉਨ੍ਹਾਂ ਦਾ ਪ੍ਰਮੁੱਖ ਟੀਚਾ ਰਿਹਾ। ਟਰੰਪ ਨੇ ਕਿਹਾ ਕਿ ਅਮਰੀਕਾ ਨੇ ਊਰਜਾ ਖੇਤਰ ਵਿੱਚ ਆਪਣੀ ਉਤਪਾਦਨ ਸਮਰੱਥਾ ਵਿੱਚ ਭਾਰੀ ਵਾਧਾ ਕੀਤਾ ਹੈ, ਜਿਸ ਨਾਲ ਮੁਲਕ ਨਾ ਸਿਰਫ਼ ਇੱਕ ਫ਼ੌਜੀ ਮਹਾਂਸ਼ਕਤੀ ਵਜੋਂ ਉੱਭਰਿਆ ਹੈ, ਸਗੋਂ ਗਲੋਬਲ ਊਰਜਾ ਖੇਤਰ ਵਿੱਚ ਵੀ ਸਿਰਮੌਰ ਬਣ ਗਿਆ ਹੈ।

ਆਲਮੀ ਚੌਧਰ ਮੁੜ ਕਾਇਮ ਕਰਨ ਦਾ ਦਾਅਵਾ

ਵਿਸ਼ਵ ਮੰਚ ’ਤੇ ਮੁਲਕ ਦੀ ਸਰਦਾਰੀ ਦਾ ਐਲਾਨ ਕਰਦਿਆਂ ਉਨ੍ਹਾਂ ਸਪੱਸ਼ਟ ਸ਼ਬਦਾਂ ਵਿੱਚ ਕਿਹਾ, “ਅਸੀਂ ਦੁਨੀਆ ਦੀ ਸਭ ਤੋਂ ਵੱਡੀ ਸੁਪਰਪਾਵਰ ਹਾਂ।” ਉਨ੍ਹਾਂ ਦੇ ਇਸ ਬਿਆਨ ਨੇ ਸਾਫ਼ ਕਰ ਦਿੱਤਾ ਕਿ ਵਾਸ਼ਿੰਗਟਨ ਦੀ ਮੌਜੂਦਾ ਵਿਦੇਸ਼, ਰੱਖਿਆ ਅਤੇ ਵਪਾਰਕ ਨੀਤੀ ਦਾ ਇੱਕੋ-ਇੱਕ ਮਕਸਦ ਕੌਮਾਂਤਰੀ ਪੱਧਰ ’ਤੇ ਅਮਰੀਕੀ ਦਬਦਬੇ ਨੂੰ ਮੁੜ ਸਥਾਪਿਤ ਕਰਨਾ ਹੈ।

ਹਾਲਾਂਕਿ ਟਰੰਪ ਵੱਲੋਂ ਪੇਸ਼ ਕੀਤੀਆਂ ਗਈਆਂ ਇਹ ਦਲੀਲਾਂ ਉਨ੍ਹਾਂ ਦੇ ਰਾਜਸੀ ਬਿਆਨਬਾਜ਼ੀ ਦਾ ਅਹਿਮ ਹਿੱਸਾ ਮੰਨੀਆਂ ਜਾ ਰਹੀਆਂ ਹਨ। ਡੈਮੋਕ੍ਰੇਟਸ ਅਤੇ ਆਜ਼ਾਦ ਆਰਥਿਕ ਮਾਹਿਰਾਂ ਵੱਲੋਂ ਇਨ੍ਹਾਂ ਦਾਅਵਿਆਂ ਦੀ ਡੂੰਘੀ ਪੜਚੋਲ ਕਰਨ ਅਤੇ ਇਨ੍ਹਾਂ ਨੀਤੀਆਂ ਦੇ ਅਸਲ ਅਸਰਾਂ ’ਤੇ ਸਵਾਲ ਉਠਾਏ ਜਾਣ ਦੀ ਪੂਰੀ ਸੰਭਾਵਨਾ ਹੈ।