Search intensified for Indian-origin man in $93 million Medicare fraud in the US.: ਜੈਨੇਟਿਕ ਟੈਸਟਿੰਗ ਦੇ ਨਾਂ ’ਤੇ ਕਰੋੜਾਂ ਡਾਲਰ ਦੇ ਫ਼ਰਜ਼ੀ ਮੈਡੀਕੇਅਰ ਦਾਅਵੇ ਪੇਸ਼ ਕਰਨ ਦੇ ਦੋਸ਼ ਹੇਠ ਅਮਰੀਕੀ ਅਧਿਕਾਰੀਆਂ ਨੇ ਭਾਰਤੀ ਮੂਲ ਦੇ ਇੱਕ ਵਿਅਕਤੀ ਨੂੰ ਭਗੌੜਾ ਐਲਾਨ ਦਿੱਤਾ ਹੈ, ਜਿਸ ਦੇ ਭਾਰਤ ਦੇ ਹੈਦਰਾਬਾਦ ਸ਼ਹਿਰ ਵਿੱਚ ਹੋਣ ਦਾ ਖ਼ਦਸ਼ਾ ਜਤਾਇਆ ਗਿਆ ਹੈ।
ਅਮਰੀਕੀ ਸਿਹਤ ਅਤੇ ਮਨੁੱਖੀ ਸੇਵਾਵਾਂ ਵਿਭਾਗ (US Department of Health and Human Services) ਨੇ ਖ਼ਦੀਰ ਖ਼ਾਨ ਮੁਹੰਮਦ ’ਤੇ ਦੋਸ਼ ਲਾਇਆ ਹੈ ਕਿ ਉਸ ਨੇ ‘ਅਮੈਰੀਕਨ ਪ੍ਰੀਮੀਅਰ’ ਨਾਮਕ ਕੰਪਨੀ ਰਾਹੀਂ ਪ੍ਰਯੋਗਸ਼ਾਲਾ ਜੈਨੇਟਿਕ ਟੈਸਟਾਂ ਦੇ ਅਜਿਹੇ ਦਾਅਵੇ ਦਾਇਰ ਕੀਤੇ—ਜਾਂ ਦੂਜਿਆਂ ਰਾਹੀਂ ਦਾਇਰ ਕਰਵਾਏ—ਜੋ ਮੈਡੀਕੇਅਰ ਤਹਿਤ ਭੁਗਤਾਨ ਦੇ ਯੋਗ ਨਹੀਂ ਸਨ।
ਵਿਭਾਗ ਦੇ ਇੰਸਪੈਕਟਰ ਜਨਰਲ ਦਫ਼ਤਰ ਮੁਤਾਬਕ, ਜਾਂਚਕਰਤਾਵਾਂ ਦਾ ਅੰਦਾਜ਼ਾ ਹੈ ਕਿ ਇਸ ਧੋਖਾਧੜੀ ਰਾਹੀਂ ਲਗਭਗ 9.3 ਕਰੋੜ ਅਮਰੀਕੀ ਡਾਲਰ ਦੇ ਦਾਅਵੇ ਪੇਸ਼ ਕੀਤੇ ਗਏ, ਜਿਨ੍ਹਾਂ ਵਿੱਚੋਂ ਮੈਡੀਕੇਅਰ ਵੱਲੋਂ ਘੱਟੋ-ਘੱਟ 6.5 ਕਰੋੜ ਅਮਰੀਕੀ ਡਾਲਰ ਦਾ ਭੁਗਤਾਨ ਕਰ ਦਿੱਤਾ ਗਿਆ। ਅਧਿਕਾਰੀਆਂ ਅਨੁਸਾਰ, ਸਾਲ 2023 ਦੌਰਾਨ ਮਹਿਜ਼ 10 ਦਿਨਾਂ ਦੇ ਵਕਫ਼ੇ ਵਿੱਚ ਹੀ ਇਸ ਸ਼ੱਕੀ ਫ਼ਰਜ਼ੀਵਾੜੇ ਨਾਲ ਜੁੜੇ ਦਾਅਵਿਆਂ ਬਦਲੇ ਲਗਭਗ 1.3 ਕਰੋੜ ਅਮਰੀਕੀ ਡਾਲਰ ਜਾਰੀ ਕਰਵਾ ਲਏ ਗਏ ਸਨ।
ਇਹ ਜਾਂਚ ਟੈਕਸਾਸ ਦੇ ਨਾਰਦਰਨ ਡਿਸਟ੍ਰਿਕਟ ਅਤੇ ਹੋਰਨਾਂ ਥਾਵਾਂ ’ਤੇ ਅਗਸਤ 2023 ਤੋਂ ਅਕਤੂਬਰ 2024 ਦਰਮਿਆਨ ਹੋਈਆਂ ਗਤੀਵਿਧੀਆਂ ਨਾਲ ਸਬੰਧਤ ਹੈ।
ਅਧਿਕਾਰੀਆਂ ਦਾ ਦੋਸ਼ ਹੈ ਕਿ ਮੁਹੰਮਦ ਨੇ ਡਾਕਟਰਾਂ ਦੀ ਇਜਾਜ਼ਤ ਤੋਂ ਬਿਨਾਂ ਉਨ੍ਹਾਂ ਦੇ ਨਿੱਜੀ ਸ਼ਨਾਖ਼ਤੀ ਵੇਰਵੇ ਹਾਸਲ ਕਰਕੇ ਵਰਤੇ। ਇਸ ਜਾਣਕਾਰੀ ਦੇ ਆਧਾਰ ’ਤੇ ਉਨ੍ਹਾਂ ਮਰੀਜ਼ਾਂ ਦੇ ਜੈਨੇਟਿਕ ਟੈਸਟਾਂ ਦੇ ਬਿੱਲ ਮੈਡੀਕੇਅਰ ਨੂੰ ਭੇਜੇ ਗਏ, ਜਿਨ੍ਹਾਂ ਦਾ ਇਨ੍ਹਾਂ ਡਾਕਟਰਾਂ ਨੇ ਕਦੇ ਇਲਾਜ ਹੀ ਨਹੀਂ ਕੀਤਾ ਸੀ। ਸਿਹਤ ਵਿਭਾਗ ਅਨੁਸਾਰ, ਨਾ ਤਾਂ ਸਬੰਧਤ ਡਾਕਟਰਾਂ ਨੇ ਇਨ੍ਹਾਂ ਟੈਸਟਾਂ ਦੀ ਸਿਫ਼ਾਰਸ਼ ਕੀਤੀ ਸੀ ਅਤੇ ਨਾ ਹੀ ਮਰੀਜ਼ਾਂ ਦੇ ਇਲਾਜ ਦੌਰਾਨ ਇਨ੍ਹਾਂ ਟੈਸਟਾਂ ਦੀ ਕੋਈ ਵਰਤੋਂ ਹੋਈ ਸੀ।
ਅਮਰੀਕੀ ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਮੁਹੰਮਦ ਇਸ ਵੇਲੇ ਭਾਰਤ ਦੇ ਹੈਦਰਾਬਾਦ ਵਿੱਚ ਮੌਜੂਦ ਹੈ। ਉਸ ਨੂੰ ਭਗੌੜਾ ਐਲਾਨਣ ਦਾ ਮਤਲਬ ਹੈ ਕਿ ਅਧਿਕਾਰੀ ਇਸ ਮਾਮਲੇ ਦੇ ਸਿਲਸਿਲੇ ਵਿੱਚ ਉਸ ਦੀ ਭਾਲ ਕਰ ਰਹੇ ਹਨ।
ਇਹ ਦੋਸ਼ ਸੰਘੀ ਸਿਹਤ ਸੰਭਾਲ ਪ੍ਰੋਗਰਾਮਾਂ ਵਿੱਚ ਫ਼ਰਜ਼ੀ ਬਿਲਿੰਗ ਖ਼ਿਲਾਫ਼ ਅਮਰੀਕਾ ਵੱਲੋਂ ਵਿੱਢੀ ਵਿਆਪਕ ਕਾਰਵਾਈ ਦਾ ਹਿੱਸਾ ਹਨ। ਮੈਡੀਕੇਅਰ ਦਾਅਵਿਆਂ ਲਈ ਸਖ਼ਤ ਨਿਯਮ ਹਨ, ਜਿਨ੍ਹਾਂ ਤਹਿਤ ਡਾਕਟਰੀ ਸੇਵਾਵਾਂ ਦਾ ਵਾਜਬ ਹੋਣਾ ਅਤੇ ਅਧਿਕਾਰਤ ਤੌਰ ’ਤੇ ਤਜਵੀਜ਼ ਹੋਣਾ ਲਾਜ਼ਮੀ ਹੈ।
ਮੁਹੰਮਦ ਵਿਰੁੱਧ ਲੱਗੇ ਇਹ ਦੋਸ਼ ਹਾਲੇ ਅਦਾਲਤ ਵਿੱਚ ਸਾਬਤ ਹੋਣੇ ਬਾਕੀ ਹਨ ਅਤੇ ਕਾਨੂੰਨੀ ਤੌਰ ’ਤੇ ਦੋਸ਼ ਸਿੱਧ ਹੋਣ ਤੱਕ ਉਸ ਨੂੰ ਬੇਕਸੂਰ ਮੰਨਿਆ ਜਾਵੇਗਾ।
