Delhi Building Collapse Latest News Today: ਕੌਮੀ ਰਾਜਧਾਨੀ ਅੰਦਰ ਪੁਰਾਣੇ ਅਤੇ ਜਰਜਰ ਢਾਂਚਿਆਂ ਦੇ ਡਿੱਗਣ ਕਾਰਨ ਅਕਸਰ ਵਾਪਰਦੇ ਜਾਨਲੇਵਾ ਹਾਦਸਿਆਂ ਦੇ ਬਾਵਜੂਦ ਦਿੱਲੀ ਨਗਰ ਨਿਗਮ (MCD) ਦੀ ਕਾਰਗੁਜ਼ਾਰੀ ਲਗਾਤਾਰ ਸ਼ੰਕਿਆਂ ਦੇ ਘੇਰੇ ਵਿੱਚ ਹੈ। ਮੌਨਸੂਨ ਤੋਂ ਪਹਿਲਾਂ ਨਿਗਮ ਵੱਲੋਂ ਸ਼ਹਿਰ ਭਰ ਦੀਆਂ ਤਕਰੀਬਨ 30.7 ਲੱਖ ਇਮਾਰਤਾਂ ਦਾ ਮੁਆਇਨਾ ਕਰਨ ਦਾ ਦਾਅਵਾ ਕੀਤਾ ਗਿਆ, ਪਰ ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਸ ਵਿਸ਼ਾਲ ਅਭਿਆਸ ਦੌਰਾਨ ਪੂਰੀ ਦਿੱਲੀ ਵਿੱਚੋਂ ਮਹਿਜ਼ 62 ਇਮਾਰਤਾਂ ਨੂੰ ਹੀ ਅਸੁਰੱਖਿਅਤ ਜਾਂ ਖ਼ਤਰਨਾਕ ਕਰਾਰ ਦਿੱਤਾ ਗਿਆ।
ਇਹ ਅੰਕੜੇ ਸਾਹਮਣੇ ਆਉਣ ਮਗਰੋਂ ਪ੍ਰਸ਼ਾਸਨਿਕ ਨਿਗਰਾਨੀ ‘ਤੇ ਉਂਗਲਾਂ ਉੱਠਣੀਆਂ ਸੁਭਾਵਿਕ ਹਨ। ਸਵਾਲ ਸਿਰਫ਼ ਇਹ ਨਹੀਂ ਕਿ ਇੰਨੀ ਵੱਡੀ ਆਬਾਦੀ ਵਾਲੇ ਸ਼ਹਿਰ ਵਿੱਚ ਜਰਜਰ ਇਮਾਰਤਾਂ ਦੀ ਗਿਣਤੀ ਏਨੀ ਘੱਟ ਕਿਵੇਂ ਦਰਸਾਈ ਗਈ, ਸਗੋਂ ਇਹ ਵੀ ਹੈ ਕਿ ਜਿਨ੍ਹਾਂ ਥਾਵਾਂ ਨੂੰ ਅਸੁਰੱਖਿਅਤ ਐਲਾਨਿਆ ਜਾ ਚੁੱਕਾ ਹੈ, ਉੱਥੇ ਸੁਧਾਰ ਜਾਂ ਕਾਰਵਾਈ ਦੇ ਨਾਂ ‘ਤੇ ਸਾਲਾਂਬੱਧੀ ਸਿਰਫ਼ ਖ਼ਾਮੋਸ਼ੀ ਹੀ ਕਿਉਂ ਪਸਰੀ ਰਹਿੰਦੀ ਹੈ।
ਚਿਤਾਵਨੀਆਂ ਦੇ ਬਾਵਜੂਦ ਬਾਜ਼ਾਰਾਂ ‘ਚ ਲਟਕ ਰਹੀ ਮੌਤ ਦੀ ਤਲਵਾਰ
ਜ਼ਮੀਨੀ ਹਕੀਕਤ ਦੀ ਗੱਲ ਕਰੀਏ ਤਾਂ ਕਰੋਲ ਬਾਗ਼ ਦੀ ਮਸ਼ਹੂਰ ਗੱਫ਼ਾਰ ਮਾਰਕੀਟ ਦੀ ਇੱਕ ਇਮਾਰਤ ਨੂੰ ਆਈ.ਆਈ.ਟੀ. ਰੁੜਕੀ ਦੀ ਜਾਂਚ ਮਗਰੋਂ 2021 ਵਿੱਚ ਹੀ ਨਕਾਰਾ ਐਲਾਨ ਦਿੱਤਾ ਗਿਆ ਸੀ। ਇਸ ਗੱਲ ਨੂੰ ਪੰਜ ਸਾਲ ਬੀਤਣ ਦੇ ਕਰੀਬ ਹਨ, ਪਰ ਇਮਾਰਤ ਜਿਉਂ ਦੀ ਤਿਉਂ ਖੜ੍ਹੀ ਹੈ ਅਤੇ ਹੇਠਾਂ ਰੋਜ਼ਾਨਾ ਹਜ਼ਾਰਾਂ ਦੁਕਾਨਦਾਰ ਤੇ ਖ਼ਰੀਦਦਾਰ ਆਪਣੀ ਜਾਨ ਜੋਖਮ ਵਿੱਚ ਪਾ ਕੇ ਵਿਚਰ ਰਹੇ ਹਨ।
ਇਸੇ ਤਰ੍ਹਾਂ ਰੋਹਿਣੀ ਸੈਕਟਰ 15 ਦੇ ਕ੍ਰਿਸ਼ਨਾ ਕੁੰਜ (ਬਲਾਕ-ਬੀ, ਪਾਕਿਟ ਬੀ-6) ਵਿੱਚ ਇਮਾਰਤ ਨੰਬਰ 18 ਨੂੰ ਚਾਰ ਸਾਲ ਪਹਿਲਾਂ ਖ਼ਸਤਾਹਾਲ ਦੱਸਿਆ ਗਿਆ ਸੀ। ਇੱਥੇ ਪੱਕੀ ਮੁਰੰਮਤ ਜਾਂ ਢਾਹੁਣ ਦੀ ਬਜਾਏ ਬਾਂਸ ਦੀਆਂ ਬੱਲੀਆਂ ਦਾ ਸਹਾਰਾ ਦੇ ਕੇ ਇੱਕ ਚਿਤਾਵਨੀ ਬੋਰਡ ਲਟਕਾ ਛੱਡਿਆ ਗਿਆ ਹੈ। ਜੇਕਰ ਕੋਈ ਅਣਹੋਣੀ ਵਾਪਰਦੀ ਹੈ ਤਾਂ ਇਨ੍ਹਾਂ ਆਰਜ਼ੀ ਪ੍ਰਬੰਧਾਂ ਦੀ ਓਟ ਵਿੱਚ ਨਿਗਮ ਆਪਣਾ ਪੱਲਾ ਝਾੜਨ ਤੋਂ ਸਿਵਾਏ ਕੁਝ ਨਹੀਂ ਕਰ ਸਕੇਗਾ।
ਨਿਗਮ ਦਾ ਆਪਣਾ ਦਫ਼ਤਰ ਵੀ ਖ਼ਸਤਾਹਾਲ, ਮੈਟਰੋ ਲੰਘਣ ‘ਤੇ ਕੰਬਦੀਆਂ ਹਨ ਕੰਧਾਂ
ਸਿਰਫ਼ ਨਿੱਜੀ ਜਾਇਦਾਦਾਂ ਹੀ ਨਹੀਂ, ਪੁਰਾਣੀ ਦਿੱਲੀ ਸਥਿਤ ਐੱਮ.ਸੀ.ਡੀ. ਦਾ ਜ਼ੋਨਲ ਦਫ਼ਤਰ ਖ਼ੁਦ ਕਿਸੇ ਵੱਡੇ ਹਾਦਸੇ ਨੂੰ ਸੱਦਾ ਦੇ ਰਿਹਾ ਹੈ। ਇਮਾਰਤ ਦੀਆਂ ਕੰਧਾਂ ਦਾ ਪਲੱਸਤਰ ਝੜ ਚੁੱਕਾ ਹੈ ਅਤੇ ਇੱਟਾਂ ਨਜ਼ਰ ਆ ਰਹੀਆਂ ਹਨ। ਹੇਠੋਂ ਲੰਘਦੇ ਜ਼ਮੀਨਦੋਜ਼ ਮੈਟਰੋ ਟਰੈਕ ਕਾਰਨ ਜਦੋਂ ਵੀ ਰੇਲ ਗੱਡੀ ਗੁਜ਼ਰਦੀ ਹੈ ਤਾਂ ਪੂਰੀ ਇਮਾਰਤ ਵਿੱਚ ਕੰਬਣੀ ਛਿੜ ਜਾਂਦੀ ਹੈ।
ਸਟੈਂਡਿੰਗ ਕਮੇਟੀ ਦੀ ਬੈਠਕ ਦੌਰਾਨ ਆਮ ਆਦਮੀ ਪਾਰਟੀ ਦੀ ਕੌਂਸਲਰ ਅਰੀਬਾ ਖ਼ਾਨ ਵੱਲੋਂ ਇਹ ਮੁੱਦਾ ਉਠਾਏ ਜਾਣ ਦੇ ਬਾਵਜੂਦ ਹਾਲਾਤ ਜਿਉਂ ਦੇ ਤਿਉਂ ਹਨ। ਇਸੇ ਦਫ਼ਤਰ ਵਿੱਚ ਪ੍ਰਾਪਰਟੀ ਟੈਕਸ ਅਤੇ ਸਿੱਖਿਆ ਸ਼ਾਖਾ ਦੇ ਮੁਲਾਜ਼ਮ ਬੈਠਦੇ ਹਨ ਅਤੇ ਸੈਂਕੜੇ ਆਮ ਨਾਗਰਿਕ ਰੋਜ਼ਾਨਾ ਕੰਮ-ਧੰਦੇ ਲਈ ਇੱਥੇ ਆਉਂਦੇ ਹਨ।
ਜ਼ੋਨਾਂ ਦੇ ਅੰਕੜਿਆਂ ‘ਚ ਵੱਡਾ ਪਾੜਾ
ਨਿਗਮ ਦੀ ਰਿਪੋਰਟ ਮੁਤਾਬਕ ਖ਼ਤਰਨਾਕ ਇਮਾਰਤਾਂ ਦੀ ਸਭ ਤੋਂ ਵੱਧ ਗਿਣਤੀ (19) ਕਰੋਲ ਬਾਗ਼ ਖੇਤਰ ਵਿੱਚ ਦਰਜ ਹੋਈ। ਪੱਛਮੀ ਜ਼ੋਨ ਵਿੱਚ 9, ਸੈਂਟਰਲ ਵਿੱਚ 8, ਸਿਟੀ-ਸਦਰ ਪਹਾੜਗੰਜ ਵਿੱਚ 5 ਅਤੇ ਦੱਖਣੀ ਜ਼ੋਨ ਵਿੱਚ 4 ਇਮਾਰਤਾਂ ਇਸ ਸ਼੍ਰੇਣੀ ਵਿੱਚ ਰੱਖੀਆਂ ਗਈਆਂ। ਹੈਰਾਨੀਜਨਕ ਪਹਿਲੂ ਇਹ ਹੈ ਕਿ ਸ਼ਾਹਦਰਾ ਉੱਤਰੀ, ਸ਼ਾਹਦਰਾ ਦੱਖਣੀ ਅਤੇ ਸਿਵਲ ਲਾਈਨਜ਼ ਵਰਗੇ ਸੰਘਣੀ ਆਬਾਦੀ ਵਾਲੇ ਜ਼ੋਨਾਂ ਵਿੱਚ ਸਰਵੇ ਦੌਰਾਨ ਇੱਕ ਵੀ ਅਜਿਹੀ ਇਮਾਰਤ ਦਰਜ ਨਹੀਂ ਹੋਈ ਜਿਸ ਨੂੰ ਖ਼ਤਰਨਾਕ ਕਿਹਾ ਜਾ ਸਕੇ।
ਸਿਰਫ਼ ਸਰਵੇ ਕਾਫ਼ੀ ਨਹੀਂ, ਕਾਰਵਾਈ ਜ਼ਰੂਰੀ
ਨਿਗਮ ਵੱਲੋਂ ਲੱਖਾਂ ਇਮਾਰਤਾਂ ਦੇ ਨਿਰੀਖਣ ਦੀ ਦਲੀਲ ਆਪਣੀ ਥਾਂ ਹੋ ਸਕਦੀ ਹੈ, ਪਰ ਦਿੱਲੀ ਵਾਸੀਆਂ ਦੀ ਮੁੱਖ ਚਿੰਤਾ ਇਹ ਹੈ ਕਿ ਕਾਗ਼ਜ਼ਾਂ ਵਿੱਚ ਅਸੁਰੱਖਿਅਤ ਦਰਜ ਕੀਤੇ ਜਾਣ ਮਗਰੋਂ ਵੀ ਇਮਾਰਤਾਂ ਖ਼ਾਲੀ ਕਿਉਂ ਨਹੀਂ ਕਰਵਾਈਆਂ ਜਾਂਦੀਆਂ। ਜਦੋਂ ਤੱਕ ਲਾਪਰਵਾਹੀ ਅਤੇ ਟਾਲਮਟੋਲ ਦੀ ਨੀਤੀ ਨੂੰ ਤਿਆਗ ਕੇ ਕਮਜ਼ੋਰ ਢਾਂਚਿਆਂ ਖ਼ਿਲਾਫ਼ ਮੌਕੇ ‘ਤੇ ਠੋਸ ਕਦਮ ਨਹੀਂ ਚੁੱਕੇ ਜਾਂਦੇ, ਉਦੋਂ ਤੱਕ ਸਰਵੇਖਣ ਮਹਿਜ਼ ਇੱਕ ਪ੍ਰਸ਼ਾਸਨਿਕ ਰਸਮ ਤੋਂ ਵੱਧ ਕੁਝ ਸਾਬਤ ਨਹੀਂ ਹੋਵੇਗਾ।
