ਨਵੀਂ ਦਿੱਲੀ: ਦੇਸ਼ ਦੀ ਰਾਜਧਾਨੀ ਅਤੇ ਨਾਲ ਲੱਗਦੇ ਐੱਨਸੀਆਰ ਖੇਤਰ ਅੰਦਰ ਔਰਤਾਂ ਖ਼ਿਲਾਫ਼ ਵਧ ਰਹੇ ਜਿਨਸੀ ਅਪਰਾਧਾਂ ਦੇ ਗੰਭੀਰ ਮਾਮਲਿਆਂ ਨੂੰ ਦੇਖਦਿਆਂ ਸੁਪਰੀਮ ਕੋਰਟ ਨੇ ਖ਼ੁਦ ਦਖ਼ਲ ਦਿੱਤਾ ਹੈ। ਦਿੱਲੀ ਦੀ ਸੜਕ ‘ਤੇ ਚੱਲਦੀ ਇੱਕ ਸਲੀਪਰ ਬੱਸ ਅੰਦਰ ਨਾਬਾਲਗ ਬੱਚੀ ਨਾਲ ਹੋਈ ਦਰਿੰਦਗੀ ਸਮੇਤ ਕਈ ਤਾਜ਼ਾ ਘਟਨਾਵਾਂ ਦਾ ਨੋਟਿਸ ਲੈਂਦਿਆਂ ਅਦਾਲਤ ਨੇ ਆਪਣੇ ਪੱਧਰ ‘ਤੇ (ਸੂਓ ਮੋਟੋ) ਕੇਸ ਦਰਜ ਕਰਨ ਦੇ ਹੁਕਮ ਸੁਣਾਏ ਹਨ।
ਜਸਟਿਸ ਜੇ.ਬੀ. ਪਾਰਦੀਵਾਲਾ ਅਤੇ ਜਸਟਿਸ ਕੇ. ਵਿਨੋਦ ਚੰਦਰਨ ‘ਤੇ ਆਧਾਰਿਤ ਬੈਂਚ ਨੇ ਮਾਮਲੇ ਦੀ ਗੰਭੀਰਤਾ ‘ਤੇ ਚਿੰਤਾ ਜ਼ਾਹਰ ਕਰਦਿਆਂ 2012 ਦੇ ਬਹੁ-ਚਰਚਿਤ ਨਿਰਭਯਾ ਕਾਂਡ ਦਾ ਹਵਾਲਾ ਦਿੱਤਾ। ਜੱਜਾਂ ਨੇ ਤਲਖ਼ ਟਿੱਪਣੀ ਕਰਦਿਆਂ ਕਿਹਾ ਕਿ ਹਾਲ ਹੀ ਵਿੱਚ ਵਾਪਰੀਆਂ ਘਟਨਾਵਾਂ ਉਸੇ ਦਿਲ-ਕੰਬਾਊ ਅਪਰਾਧ ਦੀ ਯਾਦ ਦਿਵਾਉਂਦੀਆਂ ਹਨ, ਜਿਸ ਨੇ ਪੂਰੇ ਮੁਲਕ ਨੂੰ ਝੰਜੋੜ ਕੇ ਰੱਖ ਦਿੱਤਾ ਸੀ। ਅਦਾਲਤ ਨੇ ਦੋ-ਟੁੱਕ ਕਿਹਾ ਕਿ ਹਰ ਘਟਨਾ ਮਗਰੋਂ ਸਿਰਫ਼ ਹਮਦਰਦੀ ਜਤਾਉਣ ਨਾਲ ਹੱਲ ਨਹੀਂ ਨਿਕਲਣਾ; ਇਸ ਲਈ ਜ਼ਿੰਮੇਵਾਰ ਪੁਲਿਸ ਅਤੇ ਸਿਵਲ ਅਧਿਕਾਰੀਆਂ ਦੀ ਜਵਾਬਦੇਹੀ ਤੈਅ ਕਰਨੀ ਲਾਜ਼ਮੀ ਹੋਵੇਗੀ।
ਬੈਂਚ ਨੇ ਖ਼ਾਸ ਤੌਰ ‘ਤੇ ਜਨਤਕ ਥਾਵਾਂ ਜਿਵੇਂ ਕਿ ਪਾਰਕਾਂ, ਸੜਕਾਂ ਅਤੇ ਸਰਕਾਰੀ/ਨਿੱਜੀ ਟਰਾਂਸਪੋਰਟ ਵਿੱਚ ਸੁਰੱਖਿਆ ਪ੍ਰਬੰਧਾਂ ਦੀਆਂ ਖ਼ਾਮੀਆਂ ਵੱਲ ਧਿਆਨ ਦਿਵਾਇਆ। ਅਦਾਲਤ ਨੇ ਕਿਹਾ ਕਿ ਰਾਹਾਂ ‘ਤੇ ਲਾਈਟਾਂ ਦਾ ਨਾ ਹੋਣਾ, ਸੀਸੀਟੀਵੀ ਨਿਗਰਾਨੀ ਦੀ ਘਾਟ ਅਤੇ ਨਾਕਾਮ ਗਸ਼ਤ ਪ੍ਰਣਾਲੀ ਕਾਰਨ ਸ਼ਰਾਰਤੀ ਅਨਸਰਾਂ ਦੇ ਹੌਸਲੇ ਵਧਦੇ ਹਨ।
ਕਿਸੇ ਵੱਖਰੀ ਪਟੀਸ਼ਨ ਦੀ ਉਡੀਕ ਕੀਤੇ ਬਿਨਾਂ ਅਦਾਲਤ ਵੱਲੋਂ ਚੁੱਕਿਆ ਗਿਆ ਇਹ ਕਦਮ ਸਾਫ਼ ਕਰਦਾ ਹੈ ਕਿ ਪ੍ਰਸ਼ਾਸਨਿਕ ਢਿੱਲਮੱਠ ‘ਤੇ ਹੁਣ ਤਿੱਖੀ ਨਜ਼ਰ ਰੱਖੀ ਜਾਵੇਗੀ। ਆਉਣ ਵਾਲੀਆਂ ਸੁਣਵਾਈਆਂ ਦੌਰਾਨ ਸੁਪਰੀਮ ਕੋਰਟ ਵੱਲੋਂ ਔਰਤਾਂ ਦੀ ਸੁਰੱਖਿਆ ਮਜ਼ਬੂਤ ਕਰਨ ਅਤੇ ਅਜਿਹੇ ਅਪਰਾਧ ਰੋਕਣ ਲਈ ਨਵੇਂ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਜਾਣ ਦੀ ਉਮੀਦ ਹੈ।
