Amritsar Flight Delay, Air India Suspends 8 Crew Members Latest News: ਏਅਰ ਇੰਡੀਆ ਐਕਸਪ੍ਰੈੱਸ ਨੇ ਦੁਬਈ ਤੋਂ ਅੰਮ੍ਰਿਤਸਰ ਆਉਣ ਵਾਲੀ ਉਡਾਣ ਦੇ ਅੱਠ ਅਮਲੇ ਦੇ ਮੈਂਬਰਾਂ ਨੂੰ ਤਿੰਨ ਮਹੀਨੇ ਲਈ ਸਸਪੈਂਡ ਕਰ ਦਿੱਤਾ ਹੈ। ਮਿਲੀ ਜਾਣਕਾਰੀ ਮੁਤਾਬਕ ਇਨ੍ਹਾਂ ਕਰਮਚਾਰੀਆਂ ਨੇ ਜਹਾਜ਼ ਹੇਠਾਂ ਉਤਰਨ ਤੋਂ ਬਾਅਦ ਕੀਤੇ ਜਾਣ ਵਾਲੇ ਲਾਜ਼ਮੀ ਐਲਾਨ ਨੂੰ ਤੈਅ ਸਮੇਂ ਵਿੱਚ ਪੂਰਾ ਨਹੀਂ ਕੀਤਾ ਸੀ, ਜਿਸ ਕਰਕੇ ਇਹ ਕਾਰਵਾਈ ਅਮਲ ਵਿੱਚ ਲਿਆਂਦੀ ਗਈ ਹੈ।
ਇਹ ਘਟਨਾ 2 ਅਗਸਤ 2026 ਦੀ ਹੈ, ਜਦੋਂ ਦੁਬਈ ਤੋਂ ਜਹਾਜ਼ ਅੰਮ੍ਰਿਤਸਰ ਹਵਾਈ ਅੱਡੇ ਉੱਤੇ ਪਹੁੰਚਿਆ ਸੀ।
ਕੰਪਨੀ ਦੇ ਨੇਮਾਂ ਮੁਤਾਬਕ ਉਡਾਣ ਉਤਰਨ ਤੋਂ ਦੋ ਘੰਟਿਆਂ ਦੇ ਅੰਦਰ-ਅੰਦਰ ਪੋਸਟ-ਫਲਾਈਟ ਡਿਕਲੇਰੇਸ਼ਨ ਦੇਣਾ ਲਾਜ਼ਮੀ ਹੁੰਦਾ ਹੈ। ਪਰ ਇਸ ਮਾਮਲੇ ਵਿੱਚ ਅਮਲੇ ਨੇ ਮਿੱਥੇ ਸਮੇਂ ਤੋਂ 35 ਮਿੰਟ ਉੱਪਰ ਸਮਾਂ ਲਾ ਦਿੱਤਾ। ਸੂਤਰਾਂ ਅਨੁਸਾਰ ਇਹ ਪ੍ਰਕਿਰਿਆ ਜਹਾਜ਼ ਲੈਂਡ ਹੋਣ ਤੋਂ 2 ਘੰਟੇ 35 ਮਿੰਟ ਬਾਅਦ ਮੁਕੰਮਲ ਕੀਤੀ ਗਈ ਸੀ।
ਡਰੱਗ ਟੈਸਟ ਰਿਪੋਰਟ ਰਹੀ ਨੈਗੇਟਿਵ
ਦੇਰੀ ਹੋਣ ਕਾਰਨ ਏਅਰਲਾਈਨ ਨੂੰ ਆਪਣੇ ਮਿਆਰੀ ਪ੍ਰੋਟੋਕੋਲ ਤਹਿਤ ਕਾਰਵਾਈ ਕਰਨੀ ਪਈ। ਨਸ਼ੀਲੇ ਪਦਾਰਥਾਂ (ਸਾਈਕੋਐਕਟਿਵ ਸਬਸਟੈਂਸ) ਦੀ ਵਰਤੋਂ ਦੀ ਨਿਗਰਾਨੀ ਸਬੰਧੀ ਬਣਾਏ ਗਏ ਸਖ਼ਤ ਨੇਮਾਂ ਤਹਿਤ ਅੱਠੇ ਜਣਿਆਂ ਦਾ ਮੈਡੀਕਲ ਟੈਸਟ ਕਰਵਾਇਆ ਗਿਆ। ਖ਼ੁਸ਼ਕਿਸਮਤੀ ਨਾਲ ਸਾਰਿਆਂ ਦੀ ਰਿਪੋਰਟ ਨੈਗੇਟਿਵ ਆਈ ਹੈ।
ਭਾਵੇਂ ਰਿਪੋਰਟਾਂ ਨੈਗੇਟਿਵ ਸਨ, ਪਰ ਤੈਅ ਸਮਾਂ-ਸੀਮਾ ਦੀ ਪਾਲਣਾ ਨਾ ਕਰਨ ਨੂੰ ਏਅਰਲਾਈਨ ਨੇ ਨੇਮਾਂ ਦੀ ਉਲੰਘਣਾ ਮੰਨਿਆ ਅਤੇ ਸਾਰਿਆਂ ਨੂੰ ਤਿੰਨ ਮਹੀਨਿਆਂ ਲਈ ਫ਼ਲਾਈਟ ਡਿਊਟੀ ਤੋਂ ਲਾਂਭੇ ਕਰ ਦਿੱਤਾ। ਇਸ ਬਾਰੇ ਸਿਵਲ ਹਵਾਬਾਜ਼ੀ ਡਾਇਰੈਕਟੋਰੇਟ ਜਨਰਲ (ਡੀ.ਜੀ.ਸੀ.ਏ.) ਨੂੰ ਵੀ ਸੂਚਿਤ ਕਰ ਦਿੱਤਾ ਗਿਆ ਹੈ।
ਸੁਰੱਖਿਆ ਅਤੇ ਨੇਮਾਂ ਪ੍ਰਤੀ ਸਖ਼ਤੀ
ਏਅਰਲਾਈਨ ਉਦਯੋਗ ਵਿੱਚ ਸੁਰੱਖਿਆ ਮਾਪਦੰਡਾਂ ਅਤੇ ਸਮੇਂ ਦੀ ਪਾਬੰਦੀ ਨੂੰ ਲੈ ਕੇ ਹਮੇਸ਼ਾ ਸਖ਼ਤੀ ਰਹੀ ਹੈ। ਮੌਜੂਦਾ ਮਾਮਲੇ ਵਿੱਚ ਕਿਸੇ ਵੀ ਕਰਮਚਾਰੀ ਵੱਲੋਂ ਨਸ਼ੇ ਦੀ ਹਾਲਤ ਵਿੱਚ ਕੰਮ ਕਰਨ ਦਾ ਕੋਈ ਮਾਮਲਾ ਸਾਹਮਣੇ ਨਹੀਂ ਆਇਆ, ਕਿਉਂਕਿ ਸਾਰੇ ਟੈਸਟ ਕਲੀਅਰ ਸਨ। ਅਸਲ ਮੁੱਦਾ ਸਿਰਫ਼ ਨੇਮਤ ਸਮੇਂ ਦੇ ਅੰਦਰ ਕਾਗਜ਼ੀ ਕਾਰਵਾਈ ਪੂਰੀ ਨਾ ਕਰਨ ਦਾ ਹੈ।
ਹਵਾਬਾਜ਼ੀ ਖੇਤਰ ਵਿੱਚ ਅਜਿਹੇ ਕਦਮ ਇਸ ਲਈ ਚੁੱਕੇ ਜਾਂਦੇ ਹਨ ਤਾਂ ਜੋ ਹਰ ਤਰ੍ਹਾਂ ਦੀਆਂ ਪ੍ਰਕਿਰਿਆਵਾਂ ਸਮੇਂ ਸਿਰ ਨੇਪਰੇ ਚੜ੍ਹ ਸਕਣ। ਫਿਲਹਾਲ ਇਸ ਦੇਰੀ ਦੇ ਅਸਲ ਕਾਰਨਾਂ ਬਾਰੇ ਹੋਰ ਵੇਰਵੇ ਸਾਹਮਣੇ ਨਹੀਂ ਆਏ ਹਨ।
